橄欖油消化餅

        前排世衛公佈，加工肉類食品屬於致癌物質，其毒性相當於石棉、香煙同酒精，初時聽到報導都唔覺得好意外，但跟住聽埋落去，話牛肉、豬肉等紅肉都屬於致癌食品，呢樣就真係有啲 shock，話因為多攝取紅肉脂肪就會致癌。雖然我自己一向都少食，但真係估都估唔到有咁大殺傷力！查實間唔中先食一次加工醃製食品都唔會食壞人嘅，又唔係叫你日日食，都唔使話驚到要謝絕所有加工食品，我成日都話，食煙嘅人未必係肺癌死，飲酒嘅人亦唔一定會死於肝癌，正所謂該死就唔使病，食幾多著幾多都真係整定嘅！！

 

        識整西點的話就肯定知道一定會用到大量牛油，不單只口感鬆脆，仲會增加成品香味，但對我嚟講嗰種唔係香而係臊，所以我已經無用好耐，真係頂唔順佢嘅味道，而且都係屬於動物性脂肪，多食都無益。本來用 margarine 代替就最啱，臊味奶味都無，不過有反式脂肪就仲死得人多，都係盡量少用，所以我整西點盡可能都係用液體油，唔單只係麵包同 muffin，就連餅乾、批底同 scone 我都試過用液體油整，效果有時比起用牛油更加鬆脆，真係好奇怪！

 

 

最近喺超市見到有橄欖油消化餅賣，咁啱又做緊特價，$10 有找，

即刻買咗嚟試，個 texture 比起一般消化餅鬆脆，味道仲

無咁甜㖭！當然，製造商都唔會全用橄欖油去生產，

成本高好多嘛，所以其實都只係佔油脂份量嘅

一部份，其餘部份都係繼續用番棕櫚油。