肉桂薑味猶太麵包 Cinnamaon & Ginger Bagel

        老友最近做老闆開 bakery 學校，打頭陣嘅課程係整 bagel，原本佢都叫我一齊去上堂，但可惜當日要教琴，所以無去到。不過唔緊要啦，自己匿喺個私家廚房度玩個夠吧！

 

 

材料：
山合桃         適量
高筋麵粉      200 克
低筋麵粉      50 克
肉桂粉          2 克
薑粉             2 克
糖                13 克
鹽                 5 克
酵母             2 克
橄欖油         5 克
水                140 毫升

- 山合桃放入已預熱至 140 ℃ 嘅焗爐內，焗約 15 分鐘至香味出，放涼後切細備用。

- 將粉類、糖、鹽、橄欖油同酵母混合，逐少加水搓成麵糰。

- 將麵糰拎出，放上已灑粉嘅枱面，繼續搓揉及摔打成光滑麵糰。

- 包入山合桃後將麵糰滾圓，放入已灑粉嘅兜內，用保鮮紙封好，發酵 30 分鐘。

- 麵糰排氣後平均分割成 4 份，分別滾圓，靜置鬆弛 15 分鐘。

- 用擀麵棍將麵糰擀薄成長橢圓形，左右兩邊各摺入 1/3，然後再對摺，捏堅收口。

- 麵條邊搓邊拉長，其中一端按平按扁，然後包住另一端，捏堅收口位置。

- 麵糰放上已裁好適當大細嘅牛油紙上，發酵約 40 分鐘至兩倍大。

- 煲滾水，加糖煮至完全溶解，之後將火力調至最細。

- 將麵糰放入滾水內，每邊煮 30 秒，撈起瀝乾水份，放回牛油紙上。

- 麵糰連牛油紙放上烤盤，放入已預熱至 220 ℃ 嘅焗爐內，焗約 15 分鐘至表面金黃。

- 出爐後放架上攤凍。

以上材料份量可做直徑約 10 厘米麵包 4 個。

 

 

 

學識咗將牛油紙裁成獨立單張，製作效果真係好好多，

麵糰放入滾水內煮都唔會變形兼 "漏氣"。

 

唔知係咪因為我自己食得辣呢，落咗咁多薑粉都唔係

好覺有薑味，下次要加倍份量至得！

 

今日十五食齋嘛，所以夾咗塊素黑椒煎雞扒，再加生菜、

番茄同酸青瓜，健康美味嘅素漢堡就做好喇！

 

 

 

 

Notes：
- 山合桃即 pecan，亦稱胡桃或碧根果仁，若無的話可用一般合桃代替。

- 麵糰經糖水煮過之後會更加容易焗至金黃色，每 500 毫升水就加 25 克糖。

- 加入低筋麵粉可令麵包質地更加紮實煙韌。

- 肉桂粉及薑粉可隨個人口味增減。