繼續做義工

        既然都已經提早開始咗做義工嘅計劃，咁就唔好俾佢停。

 

        由於自己喺工作同生活上，某程度上有好幾方面都屬於少眾，所以好清楚當中被人誤解，甚至係歧視的感受，所以我一直以嚟都希望做義工嘅服務對象係一啲易被忽略及誤解嘅少眾。加入「WeWah 音樂家」係幫基層家庭嘅小朋友圓夢，打破只有相當經濟能力家庭嘅小朋友先至可以學鋼琴，而今次呢份義工嘅對象就係 LGBT community，所以噚日由朝企到晚，攰到爆之餘仲曬到變咗隻燒豬。

 

        Pinkdot 原本係由新加坡發起嘅一個活動，提倡建構「平等互愛、多元共融」嘅社會，活動係一個大型戶外露天嘉年華會，LGBT community 邀請自己家人及朋友一齊出席，與一家大細及朋友一齊野餐，大家開開心心一齊玩。2014 年就引入到香港，所以今年已經係第二屆。

 

 

 大會官方 poster。

 

 

 

 

 

 

成世人最唔鍾意就係粉紅色，估唔到都會有

著粉紅衫嘅一日，哈哈！！ :))

 

 

另一個吸引我參加嘅原因係因為活動係喺添馬公園舉行，

公園起好咁耐我都從未去過，你叫我呢個鄉下仔專登搭

$40 車兼來回嘥成三、四粒鐘車程出城去見識

一下，我真係啋你都傻，但如果係

因為工作的話就唔介意囉！

 

 

 

 

 

 

今年大會主題係「Love is Love」！

 

場內都有各式各樣嘅活動，小朋友都照顧到，

仲有幫人影全家福同情侶相。

 

 

 

由於我自己係 "低能" 人仕，除咗自己嘅專業之外，其他就

乜都唔識，搬、抬、托呢家嘢就更加唔使預我！

所以我都係申請負責 F&B 位置好喇，

起碼都叫做對飲食有少少認識啦。

 

 

 

 

 

 

        活動仲有一場午間音樂會同一場黃昏音樂會，由於我唔多留意流行音樂，所以午間音樂會啲表演嘉賓真係一個都唔識。至於黃昏音樂會就大部份都識喇，既然係 LGBT 相關活動，當然會有明哥黃耀明同何韻詩啦，今年仲邀請到男神黃宗堯擔任粉紅大使，仲有已經好耐無露面演出嘅盧冠庭，當然更加唔少得一直都支持兼力撐同志平權運動嘅平機會主席周一嶽醫生啦！但睇嚟政府就唔多鍾意佢喇，已經正式公開招聘新任主席，所以周醫生都未必可以留任囉！

 

 

 

呢個時候其實係全場人 form 一個 pink dot，自己用手機

就無可能影得到喇，只有用航拍先可以完全

睇得哂，HKFP 就有發呢條片。

 

原本到夜晚仲有一個叫做「閃亮粉紅」嘅活動，係用手機

app 發光，砌出一個粉紅圖案，但因為已經好鬼攰，

加上好友又過嚟搵我，費事要佢陪我咁耐啦，

所以都係同 team leader 講聲告辭喇！

我估完成後應該會好似新加坡呢個樣啩！