見到我煲肉湯係咪覺得好出奇呢！？真係 N 世都唔會煲一次，因為怕麻煩嘛，又要洗肉，又要汆水，汆完水之後又要洗多個煲，煲完湯之後個煲又一定要用洗潔精洗先洗得乾淨，比起煲素湯真係多好多功夫，不過因為今日無太多時間留喺屋企預備餸菜，所以就用豬骨煲湯，有瓜又有肉食，可以煮少碟餸！
除咗豬骨、節瓜同姬松茸之外，我仲落咗枝竹、眉豆同生熟
薏米，都唔知夾唔夾喇，食唔痾、食唔死就得啦！
以前媽咪話過，枝竹個彎位比較難燜得腍，所以每次都會將個
彎位留起，儲夠一定數量就用嚟煲湯，咁就一定煲
得腍喇，我依家都係照版煮碗咁做呢！。
因為我比較晏起身，通常落得街買餸都已經十一、二點鐘，
去到超市都唔會再有西施骨賣，點知噚日居然又有得
賣喎！我比較鍾意用西施骨煲湯，因為比較多肉
之餘，脂肪都相對少，湯就唔會太油。
不嬲媽咪都話豬骨汆水一定要凍水落煲，佢又無講點解，
所以我都係照做，不過試過有次貪得意煲滾水先
落豬骨，效果真係差好遠，煲一輪都唔會
好似依家咁多雜質血水出嚟。
我都係凍水落咖，我諗係因滾水落就會立即收縮，Ｄ血水雜質就好難出來了。
回覆刪除因為肉類血水都係含有蛋白質，一遇到高溫就會即刻凝固，黐番喺骨裡面，所以咪出唔到嚟囉！
刪除我依家反而多煲素湯。我下次回來都會買D姬松茸， 飲過都好香。
回覆刪除我真係好少少會煲肉湯，真係十年都唔逢一閏！
刪除係呀，姬松茸煲湯真係好香，我試過用嚟煮 risotto，一樣超香呀！
Kestrel, 你竟然煲肉湯，我以為我眼花。 我都煲咗靈芝湯飲，都係菌類。XXD
回覆刪除係哩，連 cici 妳都覺得出奇哩！！ ;)
刪除妳果然鍾意飲湯，我一出篇關於湯嘅 post 妳就即刻有回應！
煲湯落肉的，我都係用西施骨或豬展~~
回覆刪除我唔會用豬腱煲湯，雖然煲完湯之後食得番，但湯就一啲甜味都無！老友話我知，佢個相熟肉佬話豬腱唔係用嚟煲湯，係用嚟燉湯㗎！
刪除我都係凍水落，汆水果煲水真係污糟到呢........
回覆刪除西施骨好丫，煲完湯D肉仲食得
係囉，之後洗煲超麻煩，因為啲血水雜質凝固咗喺個煲身，黐到實一實，一定要用鋼絲刷先攪得掂，所以我好少煲肉湯就係嫌麻煩囉！
刪除係呀，我就係呢個原因先買西施骨囉！不過我其實比較鍾意用瘦肉煲，因為幾乎無油咁滯，啖湯特別甜，煲完之後我都照食㗎！