烤焗香草雞翼

材料：
急凍雞翼
香草

醃料：
生抽
老抽
紹酒
糖
鹽
香草

        雞翼解凍洗淨後，用抹手紙索乾水份，之後用醃料醃好，最好就醃過夜，更加入味。用180度預熱焗爐，將雞翼面向下，排好喺烤盤上，放入爐焗約10分鐘後，然後翻轉雞翼，再喺上面灑上少少香草，再焗多10分鐘度就完成。

        雞翼有濃濃嘅香草味，勁正！呢個雞翼其實係媽咪以前成日整俾我哋食 o架，我就係由果陣開始迷上咗香草喇！

P.S.  寫標籤時都唔知寫呢個係中式菜定西式菜好，因為用焗爐焗同用香草都係非常西式，但醃料就勁中式，所以最後加多個標籤 "豉油西餐"，正正就係人哋用嚟形容瑞士汁做嘅菜式。另外，香草可選擇自己鍾意嘅香草，我就用咗紫蘇 / 羅勒 (Basil) 同百里香 (Thyme) 兩種。