川椒朱古力曲奇@曲奇四重奏 Cookies Quartet

        噚日因為 Louisa 車埋我去將軍澳墳場拜我阿爺阿嫲同表舅父，所以走個陣就自然會跟車落山啦！之後佢哋兩公婆話見有啲肚餓，而我又未食 lunch，所以就揸車去咗九龍城食嘢，順便去新三陽買上海米喎。

        食完 tea後，我見 Louisa成日都話唔知謝寧間餅店喺邊，於是我就話帶佢哋去。咁啱當我哋正想行入舖頭時，謝寧就啱啱匆匆忙忙咁跑入舖頭開工，於是就由老板娘親自招呼我哋，不過我想見 Tony Wong 多啲喎，話哂都係星級甜品師傅嘛！可以搭句嗲請教吓佢整餅同整蛋糕。

        我同 Louisa 睇緊揀咩餅時，突然俾我見到有隻川椒味曲奇，我即刻諗都唔駛諗就揀定呢款，梗係要揀啲特別啲 o架嘛！到 cashier俾錢時，謝寧聽到我同 Louisa講話專登買嚟試吓辣嘅曲奇係咩味時，佢就即時同我講：「係呀，呢隻係新口味嚟 o架，我哋依家都試驗緊，不如你去試食呀！」咁好，都已經俾錢買喇，佢都叫我哋試食，咁就梗係唔客氣啦！於是謝寧就夾咗件俾我同 Louisa試食。初時食落同普通朱古力曲奇無乜特別，但過咗十零秒後，條脷就開始 feel 到辣，仲有啲花椒嘅 "麻" 同 "痺"，都幾過癮喎，不過 Louisa 就唔係咁鍾意，覺得怪怪哋，所以都係維持原判，買咗朱古力味同蝴蝶酥。

        包裝簡約，但個萬字夾好得，令成個 packing 格調提高哂！

 

        曲奇餅個真身。

 

        包裝袋個背面。

        本來諗住幫 Louisa俾埋錢請佢食嘅，點知佢係都唔肯，原本已經 3袋放埋一齊，佢係要個 staff 拎番起佢果兩袋出嚟另外俾錢，咁都無辦法啦！可能佢見貴啩，所以佢唔想我出錢。返到上車佢就話其實都幾貴，我話係呀，不過佢講明用哂有機材料，同埋選用同類材料中算係 top grade 個啲。我呢包川椒曲奇就 $48 / 20塊，即 @$2.4，咁即刻算唔算貴呢？

        我哋買呢 3 隻餅中，個 texture 最好食就係我果隻，Louisa都認同，可能係因為呢隻係最厚，所以食落最鬆化香脆。佢隻朱古力味就無乜驚喜，仲覺得有少少羶，至於隻蝴蝶酥就唔敢領教喇，因為多數都係勁甜同勁羶牛油味，所以俾唔到 comment。

        唔知有無機會見埋四重奏嘅另外三位老闆呢？