椰子麻糬 "片片"

        噚日係禮拜二，係我比較得閒嘅一日，因為晚飯喺 Louisa屋企食，所以唔駛準備夜晚果餐，晏晝又約咗媽咪以前晨運班師奶 friend飲茶，因為要俾啲台灣手信佢哋，所以連晏晝果餐都唔駛煮，見咁得閒，咪又玩吓嘢囉，揀咗個好簡單嘅麻糬波波嚟 "做實驗"，因為我都幾鍾意食 A1 Bakery果隻麻糬波波，所以就上網睇吓搵唔搵到食譜試吓自己整，原來都有好多網友試過自己整，而我今次就參考咗網友 Kiu Bee 個食譜嚟整，佢原本係整芝士麻糬嘅，不過因為我唔食芝士，所以就改咗做椰子味。

材料：
糯米粉      100克
木糬粉      15克
泡打粉      1/4茶匙
椰絲          30克
蛋              1隻
糖              40克
椰漿          50毫升
水              30毫升

原食譜可參考 Kiu Bee 嘅麻糬芝士包。 

        先將所有粉類過篩兩次，之後加入椰絲，拌勻後就加入蛋，再次拌勻，最後加埋椰漿同水拌成粉團，搓成湯圓狀，放入己預熱 180℃嘅焗爐度焗約 8分鐘就OK喇，係咪好 easy哩！

        不過easy 還 easy，我都係失敗咗。係加入椰漿同水拌成粉團時，唔知係咪因為椰漿比較稠，同埋椰絲比較吸水嘅關係，啲液體完全唔見哂，唔夠攪勻所有粉，仲有好多乾粉溝唔埋，於是我就加多少少水落去，但唔知點解，一加多少少水就變得稀過頭，好似麵糊咁，完全無法搓成粉團，但我真係落咗好少水咋，我諗最多都只係得 8-10ml，就已經攪成咁，本來可以加番多少少粉補鑊嘅，但係我又驚加多咗粉要再加水，跟住水又再次多得滯，又再加粉，如是者仲攪到唔知變咗乜，所以就索性就咁用匙羹舀上去張牛油紙上面，焗完出嚟就變成咁：

        由麻糬波波變成麻糬 "片片"！所以其實上面所寫水嘅份量係唔準確，只係根據 Kiu Bee 個 recipe 裡面液體嘅總和而計番出嚟，焗嘅時間都係少咗，因為咁薄唔駛焗好耐都已經得喇。  

        不過味道同口感都唔差 o架 ( 又用 "口感" 去形容，想俾阿蘇 "丙" 呀！) ，我同老豆都覺得好似老婆餅餡嘅味道，直情係十足十，連個 look 都好似。 照計老婆餅餡係用冬瓜茸整成 o架，唔通都有落椰絲去整？真係好似好似！

       噚日趁熱即刻食就比較軟糯，今日因為攤凍咗同比較乾身，食落就更加似 A1啲麻糬波波，所以其實應該係成功 o架！下次再有咁嘅情況，我諗真係要用茶匙逐羹逐羹咁加水先至穩陣喇。