煙火腿蘑菇包 & 藍莓蛋糕忌廉包

        好耐都無去過山崎買麵包食喇，因為手上嘅 coupon月尾到期，所以今日經過市中心時就去咗市廣場間山崎買麵包，今日就揀咗煙火腿蘑菇包同藍莓蛋糕忌廉包。

        煙火腿蘑菇包係我經常會買嘅，因為啲煙火腿味道同蘑菇係好夾，加上麵包本身有少少甜味，特別好食，返到屋企之後再焗番熱嚟食，熱辣辣之外，麵包又焗到少少香脆，寧捨滋味。所以以前媽咪仲喺度時，我哋好多時都會買返屋企，沖杯咖啡，輕鬆方便就已經係一餐 lunch 或 tea。

        至於個藍莓蛋糕忌廉包就係純粹 "搭單"，因為煙火腿蘑菇包做緊特價，$14兩個，咁無理由同款買兩個 o架！所以就揀多另一款同樣特價嘅包湊數。不過呢個藍莓蛋糕忌廉包就真係金玉其外 ( 雖不至於敗絮其中 )，睇到個款都幾特別、幾吸引，但原來切開後係 "空心老倌" 一名。

        你哋睇，成個包係空心 o架，餡都唔多啲，好彩個味道都仲尚算 OK，啲吉士甜甜哋都幾香，唔會太過失望，不過就唔係好知邊 "忽" 係蛋糕囉！