朱古力又做 discount 喇

        今日原本去惠康睇吓有冇我想要嘅嘢，點知搵唔到，如是就諗住走人啦，點知行到收銀櫃枱附近，見到啲朱古力又做特價，仲要係我平時食開果兩隻味道嘅 Snickers，同埋我一直想試好耐嘅 Lindt Intense Orange Dark Chocolate，咁緊係要入番啲貨啦！

        Snickers 隻隻味道都減到 $9.9兩件，不過我淨係食 Dark 同 Almond 口味，其實佢間唔中都會賣 $10兩件。不過隻 Lindt 就唔同喇，我之前一直都好想試呢隻橙味同辣椒味，不過早排通漲，"澎" 一聲就由 ~$19 加到 $28.9，嘩，咁貴，緊係唔會買嚟食啦，你估食咗會升仙咩！如果你話一食咗保證你一定去到西方，咁就貴一貴我都會買！ 點知今日無端端俾我見到佢減到通漲前嘅價，咁咪買一排試吓囉！最衰無辣椒味，如果有又減價的話，我一定會買埋佢！

        咁就無端端又嘥錢買咗啲無謂嘢啦，最衰都係個朱古力層架擺咁近個收銀櫃枱啦！！ ( 又姓賴喇！ )  不過唔緊要啦，就當係俾學生激完之後，食番啲朱古力舒緩吓唔開心嘅情緒啦。