香茅咖喱雞

上次整完冬蔭功之後，用剩咗啲香茅、檸檬葉同青檸放雪櫃，都要盡快用咗佢。呢個時候，我就走去揭吓本娘惹食譜，睇吓有邊個食譜會用得著呢幾樣嘢，俾我發現到有個椰汁咖喱雞真係會用到香茅、檸檬葉，就連青檸都加埋落咖喱，哈，真係天助我也！！於是就參考咗佢部份用料同煮法，用咗現成港式咖喱醬，/再結合自己嘅做法，就做出呢味香茅咖喱雞喇！

 

材料：
雞
薯仔
洋蔥
番茄
椰漿
椰絲

醃料：
紹酒
生抽
蠔油

 

香料：
芫荽籽粉
香茅
南薑
咖喱醬
檸檬葉

調味料：
鹽
糖
魚露
青檸汁
辣椒油

 

- 將雞洗乾淨，切件後用醃料醃好；薯仔刨皮後切件，小部份切碎，將大件薯仔略炸至金黃。

- 洋蔥去衣後切件，留起小部份切碎；番茄洗淨，去蒂後切件。

- 香茅洗淨後用刀拍鬆，然後切小段；南薑去皮後切片。

- 燒熱鑊，放入芫荽籽粉，白鑊烘香，盛起；椰絲用白鑊炒至金黃色。

- 燒熱油，除檸檬葉外，將其餘香料及洋蔥碎全部爆香。

- 加入雞件兜炒至完全沾上香料後，將薯仔及洋蔥落鑊繼續兜抄一陣間。

- 倒入椰漿及適量水，兜炒均勻後，轉中慢火燜至材料全熟，其間不時兜炒。

- 將番茄、椰絲及調味料落鑊，不斷兜炒至咖喱汁變得濃稠即可上碟。

加咗香茅、南薑同檸檬葉一齊煮咖喱，味道帶點東南亞風味。

上碟後再加多少少辣椒油，更加香濃惹味哦！！

Notes：
- 切碎薯仔會比較容易煮至溶化，可令咖喱更加濃稠；而炸過嘅薯仔則比較硬身，無咁易煮爛。

- 洋蔥碎除作為香料用之外，亦因為比較容易煮溶，可令咖喱更加香甜。

- 炒椰絲時必須用慢火，否則好易炒燶。

- 番茄最好最後加入，否則會煮得過腍而且煮爛。