玻璃曲奇 Stained Glass Cookie

上年新年時我整咗燕麥紅莓朱古力曲奇帶返去中心度請 Miss Cheng、同事及學生食，當係新春見面禮，點知原來我唔記得咗我其中一個學生係對朱古力敏感，所以佢無得食呀！  我應承佢再整曲奇時就唔會落朱古力，等佢都可以一齊分享，佢仲話不如下次整個星形曲奇呀！嗱，Daryl，雖然我成日都老人癡呆，但我記得你講過呢句㗎，所以今年就為你而整星形曲奇呀！！

之前同 Winnie 整開嗰個食譜唔係咁掂，油脂份量大多，麵糰超軟身，即使已經放入冰格雪硬，到拎出嚟整時都會好快軟身，勁難處理，所以今次就用自己嘅方法去整，效果當然好好多啦，起碼無咁 "哩 hea" 先啦！！

材料：
低筋麵粉 350 克
泡打粉 2 茶匙
牛油 100 克
糖 80 克
糖膠 3 湯匙
雞蛋 1 隻
果汁硬糖 適量

- 麵粉與泡打粉均勻混合，放入凍牛油，用手指將牛油捽入麵粉內成麵包糠狀。

- 加糖拌勻，之後將雞蛋拂打成蛋液，連同糖膠一齊加入，用刀切拌混合。

- 然後輕手將之搓成麵糰，平均分割成 4 份，分別用保鮮紙包好，放入雪櫃內雪 1 個鐘。

- 拎出一個麵糰，攤開保鮮紙，再喺上面鋪多張保鮮紙，之後用擀麵棍將麵糰擀薄成餅皮。

- 先用一個較大嘅模將餅皮 cut 出，放上已墊入爐防黏蓆嘅烤盤上。

- 之後再用一個較細嘅模放喺餅皮中央 cut 出形狀，將中間塊麵皮移走，做成中空狀。

- 將剩出嚟嘅麵皮重新搓成糰，包好後放入雪櫃雪凍，拎出另一嚿麵糰重覆以上步驟。

- 放入已預熱至 170 ℃ 嘅焗爐內焗 6 分鐘，拎出烤盤，將已略切碎嘅硬糖放入中空位置。

- 再次入爐，用150 ℃ 焗多 6 分鐘即可，出爐後曲奇直接於烤盤上放涼數分鐘。

- 當糖完全變硬時就可以移至架上攤凍。

老實講，其實我係好憎整呢款曲奇，超多功夫兼勁麻煩，今次仲無咗 Winnie
幫手一齊整㖭！不過為咗氹小朋友同學生開心，無所謂啦！

橙味嘅心形曲奇係送俾女仔嘅，而提子味星形就送俾男仔，
圓形檸檬味就個個都有份！

Notes：
- 想方便的話，可以將製作麵糰步驟用食物處理器代勞。

- 麵糰雪凍時間需視乎天氣氣溫而增加，確保麵糰保持冰凍，不易軟化。

- 將麵糰分割成多份分別使用，好處係唔使將全部麵糰同時置於室溫而被軟化。

- 由於已成中空狀嘅麵皮非常容易變形，所以最好將麵皮移至烤盤後再 cut 成中空。

- 切忌用牛油紙代替入爐防黏蓆，因為當硬糖溶化後再凝固變硬時會黐實牛油紙。

- 放入糖之後必須將爐溫調低，以免溶糖過熱產生氣泡。

- 出爐後若發覺有溶糖唔均勻分佈的話，可趁熱用竹簽將糖推開，之後再入爐焗多 1 - 2 分鐘，
  表面就可以再次變得平滑。