2013年2月13日星期三

玻璃曲奇 Stained Glass Cookie

上年新年時我整燕麥紅莓朱古力曲奇帶返去中心度請 Miss Cheng、同事及學生食,當係新春見面禮,點知原來我唔記得咗我其中一個學生係對朱古力敏感,所以佢無得食呀!  我應承佢再整曲奇時就唔會落朱古力,等佢都可以一齊分享,佢仲話不如下次整個星形曲奇呀!嗱,Daryl,雖然我成日都老人癡呆,但我記得你講過呢句㗎,所以今年就為你而整星形曲奇呀!!

之前同 Winnie 整開嗰個食譜唔係咁掂,油脂份量大多,麵糰超軟身,即使已經放入冰格雪硬,到拎出嚟整時都會好快軟身,勁難處理,所以今次就用自己嘅方法去整,效果當然好好多啦,起碼無咁 "哩 hea" 先啦!!






材料:
低筋麵粉 350
泡打粉 2 茶匙

牛油 100
80
糖膠 3 湯匙

雞蛋 1
果汁硬糖 適量


- 麵粉與泡打粉均勻混合,放入凍牛油,用手指將牛油捽入麵粉內成麵包糠狀。



-
加糖拌勻,之後將雞蛋拂打成蛋液,連同糖膠一齊加入,用刀切拌混合。



-
然後輕手將之搓成麵糰,平均分割成 4 份,分別用保鮮紙包好,放入雪櫃內雪 1 個鐘。



-
拎出一個麵糰,攤開保鮮紙,再喺上面鋪多張保鮮紙,之後用擀麵棍將麵糰擀薄成餅皮



-
先用一個較大嘅模將餅皮 cut 出,放上已墊入爐防黏蓆嘅烤盤上。



-
之後再用一個較細嘅模放餅皮中央 cut 出形狀,將中間塊麵皮移走,做成中空狀。



-
將剩出嘅麵皮重新搓成糰,包好後放入雪櫃雪凍,拎出另一嚿麵糰重覆以上步驟。



-
放入已預熱至 170 嘅焗爐內焗 6 分鐘,拎出烤盤,將已略切碎嘅硬糖放入中空位置。



-
再次入爐,用150 焗多 6 分鐘即可,出爐後曲奇直接於烤盤上放涼數分鐘。



- 當糖完全變硬時就可以移至架上攤凍。




老實講,其實我係好憎整呢款曲奇,超多功夫兼勁麻煩,今次仲無 Winnie
幫手一齊整㖭!不過為氹小朋友同學生開心,無所謂啦!








橙味心形曲奇係送俾女仔嘅,而提子味星形就送俾男仔,
圓形檸檬味就個個都有份!







Notes
-
想方便的話,可以將製作麵糰步驟用食物處理器代勞。



-
麵糰雪凍時間需視乎天氣氣溫而增加,確保麵糰保持冰凍,不易軟化。



-
將麵糰分割成多份分別使用,好處係唔使將全部麵糰同時置於室溫而被軟化。



-
由於已成中空狀嘅麵皮非常容易變形,所以最好將麵皮移至烤盤後再 cut 成中空。



-
切忌用牛油紙代替入爐防黏蓆,因為當硬糖溶化後再凝固變硬時會黐實牛油紙。



- 放入糖之後必須將爐溫調低,以免溶糖過熱產生氣泡。

- 出爐後若發覺有溶糖唔均勻分佈的話,可趁熱用竹簽將糖推開,之後再入爐焗多 1 - 2 分鐘,
  表面就可以再次變得平滑。

6 則留言:

  1. 我以前食過D玻璃糖好硬咁喎 !
    [版主回覆02/15/2013 17:22:08]所以最好整薄少少囉!

    回覆刪除
  2. 中間用深色的會搶眼啲呢!
    [版主回覆02/15/2013 17:23:21]係啦,依家「Fox」越出越淺色,可能因為唔用色素呀!仲無乜顏色選擇,一罐裡面得四隻色咋!

    回覆刪除
  3. 真係要好有心機整先得
    [版主回覆02/16/2013 23:54:14]我都係,但整呢個唔得囉,因為果汁糖會黐到實張紙哦!
    [Mrs. Benz 班太回覆02/16/2013 18:04:58]如果整曲奇, 我多數用牛油紙就算
    [版主回覆02/15/2013 17:27:54]所以我話過我呢世都唔會再整,我同老友講,如果我霉到要瞓天橋底,即使有呢個玻璃曲奇 order 可以接,我都唔會再做呀!!
    依家用剩嘅麵糰、果汁糖同張勁油膩兼洗極都洗唔乾淨嘅防黐蓆全部俾哂個 friend,無眼屎乾淨盲!!

    回覆刪除
  4. 曲奇好靚呢, 多謝分享!
    祝你蛇年豐衣足食!身體健康!
    [版主回覆02/15/2013 17:28:44]多謝 Ka!!
    我都祝妳生活愉快、廚藝超卓!

    回覆刪除
  5. 我都好怕整曲奇...尤其天氣冷...好難洗~~~
    [版主回覆02/15/2013 17:40:23]係啦,真係唔開熱水都洗唔乾淨呀!
    不過冬天整曲奇,個麵糰又無咁易軟化喎,好茅盾呢!

    回覆刪除
  6. 好靚呀
    [版主回覆02/17/2013 00:56:25]多謝妳呀,BK!

    回覆刪除