自家製意大利蛋麵 Homemade Egg Pasta

        其實今次唔係第一次整 pasta，之前已經試整過一次，不過嗰次整時仲未買麵包機，所以用人手去搓麵糰。原來整 pasta 個麵糰係要相對整麵包麵糰乾身好多，上次因為無經驗，見個麵糰咁硬，好難搓，所以就一路整一路加水，雖然個麵糰都係整得成功，但到要切條時就即刻知衰喇，因為濕到好黐刀，就算切得到都鬆散唔到，total loss！！

        依家有部麵包機，當然又心郁郁想再試多次啦！將所有材料倒入攪拌桶內，按 “烏冬及意粉麵糰” 模式就攪掂，卒之都成功做到喇！

材料：
意大利 00 粉     300 克
硬小麥粉           50 克
雞蛋                   3 隻
蛋黃                   3 個

- 將兩種麵粉混合好；雞蛋與蛋黃略拂打成蛋液。

- 麵粉放枱上，堆成山丘狀，撥空中間位置。

- 倒入蛋液，逐少與麵粉混合搓揉成麵糰。

- 用保鮮紙包好麵糰，放入雪櫃內鬆弛最少 30 分鐘。

- 拎出麵糰分割成數份，用擀麵棍盡量擀薄成長形麵皮。

- 灑上適量硬小麥粉，然後將麵皮較長嘅一邊左右向內摺入，做成 3 層重疊。

- 用刀切成適當粗幼度後，醬麵條鬆開，再灑上適量硬小麥粉防黏。

- 煲滾水，放少許鹽，放入麵條煮數分鐘即可。

以上材料份量可做約 500 克麵糰。

食譜出自傅季馨嘅《美味意大利粉》。

杜蘭小麥粉與意大利 00 粉。原來 00 粉都有分高筋粉同

低筋粉，好彩喺 Facebook 度問過 Margaret，整

麵條係要用低粉，如果唔係我就實買錯喇！

 上次試整時影落嘅相，點知最後都係失敗收場！！

諗住切粗啲整闊條麵，但無壓麵機幫手，用人手

擀麵始終唔夠薄，所以就變得粗上加粗，

烚好嘅麵條變得好肥大！！

整咗個簡化版嘅肉醬意粉。雖然麵條變到又厚又肥，但食落

口感同乾麵條真係完全唔同，al dente 得嚟唔會硬

同實，下次再整時切番幼啲應該好好多！

Notes：
- 硬小麥粉即杜蘭小麥粉，英文為 durum wheat flour，意文即 semolina，是一種蛋白質
  含量比高筋麵粉還要高嘅小麥麵粉，適合製作成意大利麵，增加 al dente 煙韌口感。

- 如果用麵條機製作的話，麵糰分割後即可用機擀薄及切麵條。

- 做好嘅麵條如果唔係即刻煮的話，可以暫時放入雪櫃內保存。

- 肉醬意粉做法，請參閱《肉醬意粉》。