2014年7月24日星期四

自家製意大利蛋麵 Homemade Egg Pasta

        其實今次唔係第一次整 pasta,之前已經試整過一次,不過嗰次整時仲未買麵包機,所以用人手去搓麵糰。原來整 pasta 個麵糰係要相對整麵包麵糰乾身好多,上次因為無經驗,見個麵糰咁硬,好難搓,所以就一路整一路加水,雖然個麵糰都係整得成功,但到要切條時就即刻知衰喇,因為濕到好黐刀,就算切得到都鬆散唔到,total loss!!

        依家有部麵包機,當然又心郁郁想再試多次啦!將所有材料倒入攪拌桶內,按 烏冬及意粉麵糰模式就攪掂,卒之都成功做到喇!



材料:
意大利 00      300
硬小麥粉           50
雞蛋                   3
蛋黃                   3


- 將兩種麵粉混合好;雞蛋與蛋黃略拂打成蛋液。

- 麵粉放枱上,堆成山丘狀,撥空中間位置。

- 倒入蛋液,逐少與麵粉混合搓揉成麵糰。

- 用保鮮紙包好麵糰,放入雪櫃內鬆弛最少 30 分鐘。

- 拎出麵糰分割成數份,用擀麵棍盡量擀薄成長形麵皮。

- 灑上適量硬小麥粉,然後將麵皮較長嘅一邊左右向內摺入,做成 3 層重疊。

- 用刀切成適當粗幼度後,醬麵條鬆開,再灑上適量硬小麥粉防黏。

- 煲滾水,放少許鹽,放入麵條煮數分鐘即可。

以上材料份量可做約 500

食譜出自傅季馨嘅《美味意大利粉》。



杜蘭小麥粉與意大利 00 粉。原來 00 粉都有分高筋粉同
低筋粉,好彩喺 Facebook 度問過 Margaret
麵條係要用低粉,如果唔係我就實買錯喇!







 上次試整時影落嘅相,點知最後都係失敗收場!!






諗住切粗啲整闊條麵,但無壓麵機幫手,用人手
擀麵始終唔夠薄,所以就變得粗上加粗,
烚好嘅麵條變得好肥大!!







整咗個簡化版嘅肉醬意粉。雖然麵條變到又厚又肥,但食落
口感同乾麵條真係完全唔同,al dente 唔會
同實,下次再整時切番幼啲應該好好多!




Notes
-
硬小麥粉即杜蘭小麥粉,英文為 durum wheat flour,意文即 semolina,是一種蛋白質

  含量比高筋麵粉還要高嘅小麥麵粉,適合製作成意大利麵,增加 al dente 煙韌口感。

- 如果用麵條機製作的話,麵糰分割後即可用機擀薄及切麵條。

- 做好嘅麵條如果唔係即刻煮的話,可以暫時放入雪櫃內保存。

肉醬意粉做法,請參閱《肉醬意粉》。


4 則留言:

  1. 哈哈!您咁好心機整手工麵,我部壓麵機給我置於冷宮好耐了。

    回覆刪除
    回覆
    1. 嘩,妳有部機咁正都唔整?我都想要一部,不過又要搵地方擺先煩!

      刪除
  2. 自己做pasta 真係好好食,口感超讚,不過我懶,所以。。。。。我都有好多00粉,不過唔知有高低,高低筋是計 protein,咁即係點?英國的 plain flour 就是法國的00粉。

    回覆刪除
    回覆
    1. 妳用機整咪方便好多囉!

      其實 00 粉都係一般高低粉,只不係將粉粒磨得更加幼細,應該係砂糖同糖霜之分別。

      刪除