意式芒果雪糕 Gelato al Mango

        雖然我一向都好少食凍嘢，但夏天咁熱，間唔中都會食吓雪糕，最鍾意兼最方便就係走入「麥當奴」度食杯新地，最鍾意就係食士多啤梨新地，因為士多啤梨嘅甜味正好蓋過雪糕嘅奶味，好食好多。自從識得自製雪糕之後，夏天總會最少整一次，因為自己可以用較淡奶味嘅淡忌廉去整，咁就更加合我口味。

        上次整芒果黑糯米時，買咗一份四個芒果，用咗 1 個，仲有 3 個，於是就諗到用嚟整雪糕。要整雪糕，當然會即刻諗到我本天書《我愛冰淇淋》啦，睇睇吓，發覺書中有教整意式雪糕，意式雪糕比起一般雪糕用多啲奶，少啲忌廉，咁我又未食過意式雪糕，不妨一試！但最重要都仲係，食譜會用到蛋白霜，咁就又可以幫到我繼續清埋冰格啲蛋白啦，正！

材料：
芒果          2 隻
豆漿          200 毫升
淡忌廉      200 毫升
檸檬汁      2 湯匙
蛋白          4 隻份量
糖              100 克

- 芒果去皮、去核，起出果肉。

- 將芒果肉、豆漿、檸檬汁及 50 克糖放入攪拌機內攪打成果蓉混合物。

- 將果蓉混合物放入雪櫃內雪凍。

- 淡忌廉座冰水，用電動打蛋器打至 8 成企身，放入雪櫃保存。

- 蛋白用電動打蛋器打至起泡，之後分 3 次加入剩餘嘅糖打成蛋白霜。

- 先將果蓉混合物同打起忌廉拌勻，之後加入蛋白霜，用電動打蛋器以慢速拌勻。

- 將混合物倒入容器內，放上冰格雪凍。

- 一個鐘後，用電動打蛋器以慢速將混合物攪打幾下，再放回冰格雪凍。

- 重複以上步驟 4 - 5 次，就可以將混合物雪硬成雪糕。

初初整起時，見到顏色咁淡，仲以為實唔夠味，點知原來芒果味
非常香濃呢！所以，我依家知道，街賣果啲
顏色咁黃，肯定落咗色素啦！

 

口感果然比一般雪糕清爽、輕盈，有少少似食思樂冰。
各材料份量配搭估唔到咁好，求其亂咁嚟都能夠
調出咁好嘅味道，真係感動呀！

Notes：
- 芒果肉份量以可做成芒果蓉約 200 毫升為合。

- 糖嘅份量應根據芒果甜度而作出適當增減。

- 豆漿可用牛奶代替。

- 如用雪糕機製作雪糕的話，可直接將果蓉混合物同忌廉倒入雪糕機內攪打，然後
  將蛋白霜逐少加入。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！