今朝喺屋企食早餐時，一邊食、一邊睇報紙，睇到「百佳」啲鈣思寶呢兩日做特價，$30.8 兩排之餘，仲送多盒 1 公升裝嘅燕麥鈣思寶，真係抵到爆呀！有飲開嘅朋友都應該知道，最近已經賣到成 $17.9 一排。因為我都有飲開，所以明明今日唔駛落街買餸，我都為咗佢而專登落街，對於我呢個懶落街嘅人真係 "俾足面" 呀！( 其實係睇錢份上囉！
其實我落街時都仲未夠 12:00pm，但係去到「百佳」時，發覺已經被人掃得七七八八，剩番果啲都係凹凹凸凸，"岩岩慚慚"，有啲簡直係揀唔落手囉！我成日都喺到諗，究竟係咪所有地方都係有咁嘅情況呢？一有嚫減價就第一時間俾人掃哂貨？我諗，高尚住宅區啲超市應該唔會有咁嘅情況啩！
我揀到呢兩排已經算係較為好 o架啦，但係都唔係 "四正" 囉！原味果隻就有好多，仲排排都好 "靚仔" o添！梗係啦，原味果隻最少人買。不過唔緊要啦，無穿無爛就算，反正都唔影響飲用。
其實我係想同大家分享一下 Wnnie 嘅經驗。佢話俾我聽，佢平時身體嘅含鈣量係 below standard，但係最近去完做 body check，份 report 顯示今次佢身體嘅含鈣量已經去番 normal range 入面，所以佢估計應該係同佢長期飲鈣思寶有關。一直以嚟，我都覺得呢類加鈣飲品效果唔會太大，不過叫做好過唔飲咁啫，點知原來真係有效 o架喎，所以如果有邊位 blogger 都係身體比較缺鈣，或者流失鈣質嚴重的話，不防試飲一段時間，睇吓會唔會有改善。當然，效果因人而異之餘，亦未必個個都會有咁明顯嘅改善。
點呀 Wnnie，妳掃唔掃到貨呀？買到的話，仲有冇 1 公升裝送呢？
原來真係有用既‥之前成日飲芝麻味‥而家好似無左‥唔知係咪比人買哂‥
回覆刪除[版主回覆08/31/2010 02:19:00] 我呢兩排咪係芝麻味囉！
曬下太陽仲補鈣啦....
回覆刪除[版主回覆08/31/2010 02:18:00] 係，之但係女仔人家，或者怕曬呢。
我去FANCL CHECK話我骨質梳鬆高危…買左2包鈣片又懶得食=.=
回覆刪除[版主回覆09/01/2010 20:28:00] 嘩，妳咁都得！！妳將包鈣片放 喺水杯隔離，咁飲水時咪可以順 便 " 啪" 粒囉！
其實一向都覺得佢比較貴.........
回覆刪除所以比較少飲，都係飲開其他既高鈣低b奶..............
[版主回覆09/01/2010 20:28:00] 因為我唔飲奶 o架嘛，所以咪飲豆漿囉！
好抵喎..今日先睇到, 應該都無哂貨lu
回覆刪除[版主回覆09/01/2010 20:30:00] 係呀，真係好抵！
真係得咩? 我最近在家踼裂左腳尾趾骨, 醫左兩個月都仲有少少痛, 等我都飲D試下。
回覆刪除[版主回覆09/01/2010 20:30:00] 乜鈣質可以幫助唔痛 o架！？
有痛即係D骨未生埋, 補充鈣有幫助掛。
回覆刪除[版主回覆09/02/2010 00:03:00] 原來係咁！我真係無常識喇！！
我覺得飲左芝麻味呢個暢便左好多......雖然我中意原味多D, 但呢個好似有益D
回覆刪除[版主回覆01/27/2011 00:16:00] 真係咁有效？咁妳真係要繼續飲喇！我自己腸胃不 嬲都好好， 無排便煩惱，所以唔知道佢功效去到邊，只係鍾意個味道，另一隻燕麥味都唔錯呀！ 飲佢好過飲汽水啦！