牛油果三文魚反卷

        熱氣咁熱，真係無乜胃口食飯，對住碗熱辣辣嘅飯，都真係唔係好大興趣。之但係，如果一日裡面，午餐同晚餐都唔食飯的話，又驚住會唔夠飽，好快肚餓！喺呢個時候，最好就係食壽司喇！有飯落肚之餘，又唔會食到成身汗，仲有埋餸  o添，咁你話係咪一個唔錯嘅選擇呢！

        今晚貪得意，整咗個反卷，不過因為係第一次整，都覺得有少少難度，所以個賣相唔多靚仔！不過唔緊要啦，反正都係自己食咋嘛，唔靚仔都係照樣食落肚 o架啦！

材料：
珍珠米
白醋
壽司紫菜
青瓜
三文魚
牛油果
沙律醬

- 米洗乾淨，煲熟成飯後，加入適量白醋，拌勻，攤凍備用。

- 青瓜洗乾淨，切去頭尾，然後一開四切成長條狀；三文魚切條。

- 牛油果對半切開、去核，之後用匙羹舀出果肉，切條備用。

- 先喺壽司蓆上鋪上保鮮紙，然後放上紫菜。

- 壽司飯鋪滿整張紫菜之後，將紫菜連飯一齊反轉放喺保鮮紙上，即飯向下，紫菜
  喺面。

- 沙律醬唧喺紫菜上，之後放上青瓜條、三文魚條同牛油果。

- 將蓆連保鮮紙一齊捲起，一邊捲，一邊將飯同餡料按實。

- 捲成壽司條之後，用利刀切件即可享用。

咁 "轎" 樽沙律醬啱啱食完，又唔想為咗整個反卷而專登走去買，
所以就地取材，用千島汁代替，反而有些少酸味更覺清新。

Notes：
- 要風味正宗的話，請選用壽司米、壽司醋及日式沙律醬。

- 青瓜最好用短身嘅溫室青瓜，因為比較清甜，而且長度比較適合做壽司。

- 沙律醬只需唧出幼幼一條即可。

- 切壽司時，最好先將刀濕水，可防止飯粒黐刀。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！