Aceto Balsamico di Modena

        睇見 topic 個幾個意大利文，估唔估到點解呢？ Aceto 即係 vinegar；Balsamico 即係 balsamic；di 即係 of；Modena 係意大利一其中一個地方，咁所以 Aceto Balsamico di Modena 嘅意思係 Balsamic vinegar of Modena，即係 Modena 出產嘅意大利陳醋囉！

        因為一直都有諗住買 Balsamic vinegar，所以都有喺 「Taste」留意過。其實有平有貴，價錢真係可以相差好遠，由三十零蚊到三百幾蚊支都有！不過我留意到一樣嘢，不論價錢平貴，原來好多時 Balsamic vinegar 都會落色素，一睇到個 ingredient 有用到色素，我就即刻放低！由細到大，我都好怕有色素嘅食物。

        千挑萬選，最終我就睇中咗呢隻牌子： 

對於我嚟講，呢支陳醋價錢比較合理同相宜，$42.9 / 250 ml。

 

        其實我做好哂 research 之後，就已經決定買呢支陳醋，因為無用色素之餘，仲係用有機提子釀造，而且 blog 友毛豆話 Modena 出產嘅陳醋係最靚嘅。當時售價係 $39.9，不過諗住未需要用到就唔買住，點知到我想買時，突然咁多間「Taste」同「百佳」都斷咗貨，咁之後等咗幾個月，卒之有番貨，不過已經係賣 $42.9，咁都無辦法啦，要用就要買，都係貴咗 $3 啫！點知，過咗大約一個月後嘅今日，已經 "標" 到五十幾六十蚊支，嘩，搶咩，咁短時可以加到咁犀利，真係人都癲！！好彩之前買咗咋！

        睇嚟，收藏陳醋都係一種投資！