2010年8月30日星期一

鈣思寶原來都真係有效 o架!

        今朝喺屋企食早餐時,一邊食、一邊睇報紙,睇到「百佳」啲鈣思寶呢兩日做特價,$30.8 兩排之餘,仲送多盒 1 公升裝嘅燕麥鈣思寶,真係抵到爆呀!有飲開嘅朋友都應該知道,最近已經賣到成 $17.9 一排。因為我都有飲開,所以明明今日唔駛落街買餸,我都為咗佢而專登落街,對於我呢個懶落街嘅人真係 "俾足面" 呀!( 其實係睇錢份上囉! ) 有好嘢,當然要同朋友一齊分享啦!所以我都即刻 call Winnie 話俾佢聽,因為佢都有飲開呢! 



        其實我落街時都仲未夠 12:00pm,但係去到「百佳」時,發覺已經被人掃得七七八八,剩番果都係凹凹凸凸,"岩岩慚慚",有啲簡直係揀唔落手囉!我成日都諗,究竟係咪所有地方都係有咁嘅情況呢?一有嚫減價就第一時間俾人掃哂貨?我諗,高尚住宅區啲超市應該唔會有咁嘅情況啩!



        我揀到呢兩排已經算係較為好 o架啦,但係都唔係 "四正" 囉!原味果隻就有好多,仲排排都好 "靚仔" o添!梗係啦,原味果隻最少人買。不過唔緊要啦,無穿無爛就算,反正都唔影響飲用。


        其實我係想同大家分享一下 Wnnie 嘅經驗。佢話俾我聽,佢平時身體嘅含鈣量係 below standard,但係最近去完做 body check,份 report 顯示今次佢身體嘅含鈣量已經去番 normal range 入面,所以佢估計應該係同佢長期飲鈣思寶有關。一直以嚟,我都覺得呢類加鈣飲品效果唔會太大,不過叫做好過唔飲咁啫,點知原來真係有效 o架喎,所以如果有邊位 blogger 都係身體比較缺鈣,或者流失鈣質嚴重的話,不防試飲一段時間,睇吓會唔會有改善。當然,效果因人而異之餘,亦未必個個都會有咁明顯改善。


        點呀 Wnnie,妳掃唔掃到貨呀?買到的話,仲有冇 1 公升裝送呢?


8 則留言:

  1. 神奇女俠Natalie2010年8月30日 下午5:17

    原來真係有用既‥之前成日飲芝麻味‥而家好似無左‥唔知係咪比人買哂‥
    [版主回覆08/31/2010 02:19:00]        我呢兩排咪係芝麻味囉!

    回覆刪除
  2. 曬下太陽仲補鈣啦....
    [版主回覆08/31/2010 02:18:00]        係,之但係女仔人家,或者怕曬呢。

    回覆刪除
  3. 我去FANCL CHECK話我骨質梳鬆高危…買左2包鈣片又懶得食=.=
    [版主回覆09/01/2010 20:28:00]        嘩,妳咁都得!!妳將包鈣片放 喺水杯隔離,咁飲水時咪可以順 便 " 啪" 粒囉!

    回覆刪除
  4. 其實一向都覺得佢比較貴.........
    所以比較少飲,都係飲開其他既高鈣低b奶..............
    [版主回覆09/01/2010 20:28:00]         因為我唔飲奶 o架嘛,所以咪飲豆漿囉!

    回覆刪除
  5. 好抵喎..今日先睇到, 應該都無哂貨lu
    [版主回覆09/01/2010 20:30:00]        係呀,真係好抵!

    回覆刪除
  6. 真係得咩? 我最近在家踼裂左腳尾趾骨, 醫左兩個月都仲有少少痛, 等我都飲D試下。
    [版主回覆09/01/2010 20:30:00]        乜鈣質可以幫助唔痛 o架!?

    回覆刪除
  7. 有痛即係D骨未生埋, 補充鈣有幫助掛。
    [版主回覆09/02/2010 00:03:00]        原來係咁!我真係無常識喇!!

    回覆刪除
  8. 我覺得飲左芝麻味呢個暢便左好多......雖然我中意原味多D, 但呢個好似有益D
    [版主回覆01/27/2011 00:16:00]        真係咁有效?咁妳真係要繼續飲喇!我自己腸胃不 嬲都好好, 無排便煩惱,所以唔知道佢功效去到邊,只係鍾意個味道,另一隻燕麥味都唔錯呀!         飲佢好過飲汽水啦!

    回覆刪除