黑麥@Pumpernickel

       無錯，的確又係「Pumpernickel」嘅黑麥包，真係勁鍾意佢囉，介紹嚫俾朋友試，無一不立即愛上它，Lily 如是、Winnie 如是、就連 Louisa 都如是，你話呢個黑麥包係咪真係魅力沒法擋呢！

        今次唔再係 Lily 買俾我食啦，掉返轉係我親自過去香港果邊買番俾佢食。星期一果日同 Miss Cheng 食完 Lunch，Winnie就同我一齊過咗去香港果邊行街，我過香港果邊除咗因為要去灣仔買香料之外，另一個重要任務就係去「黑麥」度買黑麥喇！

 

 

 

今次我專登去吓銅鑼灣加寧道間新店度買，因為喺 Openrice

度見到間舖張相好似好高級、好靚咁款，咪過去

八卦吓囉！呢間舖嘅格調同其他舖果然

唔同，high class 好多喎！

       呢度啲黑麥包有齊哂唔同 size，有齊大、中、細碼，就係 Amanda S. 口中嘅爸爸、媽媽、同小朋友 ( 唔知我講緊乜，唔緊要，只要睇番「蔡瀾歎名菜」第18集就知喇。呢個時候係櫻井景子小姐教緊煮傳統日本料理嘅時候，蔡瀾幫手切冬菇嘅片段，睇完你就知我講乜喇 )，所以我係名符其實咁 "買起佢全家"！！！！ 哈哈哈哈 ~ ~ ~ ~ ~ ~ ~

上面張相因為太有懷舊 feel 喇，唔係好睇得清楚麵包嘅顏色，

所以用閃光燈影多張俾大家睇清楚。

        你哋唔好以為我咁瘋狂，好食就狂買咁多返屋企，仲要買起哂佢全家㖭！其實我係買返嚟做 "手信" 同回禮咋，我淨係要個 "爸爸" 同一個 "小朋友"，另一個 "小朋友" 就送俾 Louisa 收養，而個 "媽媽" 就交俾 Lily 照顧㗎。

        Louisa 食完第一啖之後，都唔知講咗幾多次「好食」呢兩個字，咁啱佢家姐嚟到，佢又叫家姐試吓，家姐試過之後又話好食，跟住就繼續食埋剩低果啲，點知 Louisa 見到就即刻話：「家姐，妳唔好食哂佢，留番俾我呀！」可想而知，呢個黑麥係幾咁受歡迎呢！之後同家姐傾傾吓，原來佢都知道上環間分店喺邊度，因為佢係喺果頭住㗎，於是我就好唔客氣咁同家姐講：「咁我遲啲搭妳幫我買啦！」

        要 "買起哂佢一家大細" 都唔少錢㗎，呢度就盛惠 $80。嘩，諗落以我嘅經濟環境都算好奢侈，食麵包都食咗 $80。好彩，我專登周街行，行到 8:30pm 先至入去買㗎，因為 8:30pm 後全場麵包 7折發售，所以都只不過係 $56 啫，買麵包買到要碌 credit card 都係第一次！而 Winnie 就因為趕住要返屋企食飯，所以無同我一齊等到 8:30pm 後先買，我一早已經陪佢去咗天后琉璃街總店以正價 $35 買咗個 "爸爸" 喇。   

呢張係 Pumpernickel 嘅公司卡片，但好奇怪，唔知點解唔用番

pumpernickel 嚟做 design 而要用 baguette 呢！