麥芽糖梳打餅

        噚日睇到網友 Kelly 寫咗篇關於麥芽糖梳打餅嘅 blog，都幾攪笑 o架，因為佢原本整咗啲餅俾佢媽咪食，但佢媽咪話唔食，因為呢啲餅只係要嚟 "呃" 小朋友！睇完之後，我諗起自己都有麥芽糖同梳打餅，於是今朝就決心做番小朋友，自己呃吓自己先！

        你睇，打咗燈個效果唔同哂，金黃色兼晶瑩通透，唔怪得之秋官拍戲時成日都要攞住塊反光板啦，哈哈哈哈！

        我都好鍾意果種又鹹又甜嘅味道，好特別，而我呢包梳打餅因為係蔬菜味，所以果味就更加特別！

        講開麥芽糖，大家如果要買麥芽糖的話，就記住唔好買呢隻牌子，因為完全唔係我哋以前細個食過果種味道，而且又唔甜，Louisa 都買過呢隻，佢都係有同感。之後俾我發現喺裕記有傳統果種麥芽糖賣，即係紅色膠蓋，白色樽身果隻呢。我見到就即刻買一樽俾 Louisa試，佢一試就話：「係呢隻味啦！」所以大家記得認住傳統果隻款先好買呀！