2009年5月20日星期三

法式焦糖燉蛋 Crème brûlée

        好耐都無試過大昏迷喇!因為噚日dayoff,知道唔駛出去教琴,屋企又無乜特別嘢要做,所以好放心咁盡情去瞓,前一晚因為喺 Louisa 屋企食完飯之後,除咗食生日蛋糕之外,仲有幫 Louisa 整香蕉蛋糕,所以好夜先走,返到屋企沖完涼,睇一陣書,點 零兩 點先瞓,第二朝12 點半先起身,所以噚日好夠精神。


        夜晚就好求其咁煮咗個咖喱菠蘿吞拿魚意粉食 ( 間中偷吓懶先 ),食完哂洗埋碗都仲好早,所以就郁手整甜品食,呢個Crème brûlée 都想整好耐 o架喇,不過一直都無買到淡忌廉,所以一路都無整,直到最近荃灣間二德惠買嘢有雙倍積分,加上 200ml 嘅淡忌廉又做緊特價,$45 / 3 (依家 $44 / 3 o添咋 )所以就起心買,咁依家咪整到 Crème brûlée 囉!



        材料同做法都好簡單。


材料:
蛋黃        2隻
淡忌廉    125克
豆漿        125克
砂糖        20克


以上材料可做 2 - 3杯燉蛋


- 先用 180°C預熱焗爐。

- 蛋黃同淡忌廉用蛋拂拌勻,然後加入少量豆漿再拌勻。


- 將剩低嘅豆漿煲滾,加入砂糖煮溶。


- 將熱豆漿逐少逐少拌入忌廉蛋液裡,之後再倒回煲內加熱。


- 加熱後嘅忌廉蛋液過篩倒入疏乎厘盅內,然後放上焗盤上,再倒凍水入焗盤內,
  水嘅高度約半 cm1cm


- 放入焗爐,焗 25分鐘後取出放涼,之後放入雪櫃雪10分鐘。


- 喺雪凍咗嘅燉蛋面灑上少少砂糖 (份量以外),用火槍將砂糖燒焦,做成焦糖,咁
  就食得啦!


食譜參考:香港電台美食DIY 網頁 (仲有導師整個製作過程嘅 video睇 o添呀!)


 



        啱啱出爐時果樣,可能因為個焗爐太勁,未做焦糖都已經焦咗少少。


 



        本來星期一果日係想問 Louisa 借定支火槍嚟燒焦糖,不過一來佢無 gas;二來我其實又驚驚哋用火槍,因為見到個火噴得咁猛,覺得好恐怖、好危險;三來佢又話俾我聽可以用焗爐焗啲砂糖,所以我就試吓入焗爐,淨用脆烤功能果三枝石英管嚟焗脆個表面,睇吓得唔得,但其實係唔得囉!焗咗好耐都只係得少少燶,而且我隔住爐門望入去時,見到啲燉蛋猛咁喺度郁,滾吓滾吓咁,好驚會焗過龍,焗到啲燉蛋老哂兼嚡口,最後都係放棄罷!所以喺燉蛋面會見到啲白色未溶嘅砂糖結晶。


 

Notes

1. 原食譜係用牛奶而唔係豆漿只係因為小弟唔飲奶


2. 將煲滾豆漿 /牛奶倒入忌廉蛋液時,一定要慢慢逐少逐少拌入,如果唔係啲蛋
    液就會被煮熟。


3. 忌廉蛋液心須過篩倒入疏乎厘盅內,因為可以隔咗啲被煮熟咗嘅蛋液固體,令
    到啲燉蛋更幼滑。


4. 焗好出爐嘅燉蛋一定完全攤凍或雪涼,否則當灑上砂糖製作焦糖時,熱力會將
    砂糖溶化入燉蛋內,咁就最唔成焦糖喇。


 

P.S. 


1. Louisa 話枝火槍無 gas時,我就問佢係用咩 gas,佢話用打邊爐果gas
    咁就再問佢,咁打邊爐gas喺邊度買得到,佢竟然同我講:「打邊爐gas
    
喺 賣打邊爐gas嘅地方買囉!」跟住我哋兩條友就喺度勁笑,真係俾佢吹
   
漲!


2. 用上次買返嚟嘅腐皮碎整豆漿真係好方便,十零廿分鐘啲腐皮已經煲溶哂,做
    成好濃嘅豆漿,我將食譜用剩嘅豆漿俾咗老豆飲,佢話好濃好甘香喎!


11 則留言:

  1. 我都好鍾意食Crème br û l é e ,整得好靚
    [版主回覆05/20/2009 22:23:00]        咁都話整得好靚?都無火槍燒, 啲焦糖唔 均勻呀!妳叫得做 Bakery Lover,肯定烘焙技術一流啦!淨係睇妳 啲傑作已經靚過我整果 啲多多聲。         俾妳讚完我之後突然間信心大增。

    回覆刪除
  2. 望見都好滑,面都有好靚熏焦糖.
    [版主回覆05/20/2009 22:27:00]        係呀,真係好滑,中式燉蛋同佢完全無得比!果 啲係假焦糖 嚟 o架,妳睇番未整焦糖前個蛋面已經有少少 燶喇,其實係 "焦蛋",而唔係焦糖 !

    回覆刪除
  3. 買返支火槍啦,幾十蚊加個gas就唔使再入爐,直接係面上噴火~
    [版主回覆05/22/2009 18:10:00]        幾十蚊就有支火槍?咁平咋!         其實都唔係錢 嘅問題,因為我可以問我學生借,最主要係我真係驚驚 哋用火槍,覺得好危險,我份人又 "論盡" ,分分鐘燒燒 吓焦糖變 "焦屋" 呀!         下次再整時我就問我學生借,拎返 嚟之後叫我老豆燒!

    回覆刪除
  4. Kelly's Fusionology2009年5月23日 下午1:42

    我明天都會整呀...你覺得你用呢個食譜效果如何??
    [版主回覆05/23/2009 16:56:00]        我覺得呢個食譜OK喎,我唔用奶改用豆漿都非常之滑,不過如果妳跟 RTHK網頁個食譜的話,就一定要將糖 嘅 份量減少,我睇緊個 video時,個師傅已經話如果唔想太過甜,可將份量減少,我聽到佢咁講,已經好醒目咁減 咗 一半份量 ( 打出 嚟 個食譜果 20克糖已經減 咗 半,原食譜係 40克 ),但焗完出 嚟 仍然好甜,其實我已經算係食得甜 o架喇!         妳快 啲 整啦,整完 掟張相上個 blog 度睇 吓整得靚唔靚?

    回覆刪除
  5. Kestrel,我星期二整比你食吓,好嗎?不過,我就用幼囉!重有我就係蒸既!聽日要記住去買gas果道買番支gas先 !
    [版主回覆05/27/2009 15:00:00]        唓, 噚日去到妳屋企都無得食 嘅!         咁妳記得去 "買 gas 果度" 買返支 gas 喇!

    回覆刪除
  6. 唔洗喊 !下星期二應該有得食架啦 !
    [版主回覆05/27/2009 15:51:00]        哪,係先好講呀!不過妳應該專心幫家姐攪好個 "施華洛世奇豪門夜宴" 先啦,慢慢整甜品都唔遲。

    回覆刪除
  7. 我一諗起個頭就好痕喇 !
    [版主回覆05/27/2009 16:39:00]         Hey, please be relaxed! Treat it as making dessert for your lovely family!

    回覆刪除
  8. 我都係用DIY個譜,係成功既.糖都係減咗份量,但係真係要買支槍,因為我試過,焗爐做唔到焦糖脆卜卜個效果.
    [版主回覆06/15/2009 11:51:00]         係呀,我都試過我個 friend 整俾我食 嘅 Crème br û l é e,佢就係用火槍燒糖,個面真係脆卜卜,完全係兩回事!
            不過咁貴買枝火槍又好似冇乜真正用途,所以都係唔買!

    回覆刪除
  9. 我想問下你白色個容器係邊到買架??
    [版主回覆11/20/2009 13:30:00]        果個疏乎厘盅 喺 好多地方都有得賣 o架!就連我屋企附近個屋 邨 商場間家品店都有得賣。         妳可以去烘焙店果度買,又或者去到上海街 ( 近油麻地果欄果一段 ) 果頭 啲烘焙用具專賣店,一定搵到 o架!

    回覆刪除
  10. 唔好意思呀....問返咁耐之前嘅野....
    請問你個豆漿有冇落糖? 水同腐竹比例如何?
    我都鍾意豆漿多過牛奶....^^.....thanks!!!
    [版主回覆04/11/2012 20:13:41]唔好咁講,有需要咪開聲囉,能力達到的話我都盡量解答呀!
    豆漿係無糖o架!至於水同腐竹比例,我無理o架,主要睇吓自己鍾意幾濃囉,都無乜所謂呀!
    因為我係好怕食奶類製品,怕佢嗰 "朕" 臊味,所以每次要用奶的話,我都用豆漿或清水代替。

    回覆刪除
  11. thanks! 等我試試先^^
    [版主回覆04/20/2012 17:38:59]試完再話俾我知妳嘅出品是否成功啦!

    回覆刪除