法式焦糖燉蛋 Crème brûlée

        好耐都無試過大昏迷喇！因為噚日dayoff，知道唔駛出去教琴，屋企又無乜特別嘢要做，所以好放心咁盡情去瞓，前一晚因為喺 Louisa 屋企食完飯之後，除咗食生日蛋糕之外，仲有幫 Louisa 整香蕉蛋糕，所以好夜先走，返到屋企沖完涼，睇一陣書，點 零兩 點先瞓，第二朝12 點半先起身，所以噚日好夠精神。

        夜晚就好求其咁煮咗個咖喱菠蘿吞拿魚意粉食 ( 間中偷吓懶先 )，食完哂洗埋碗都仲好早，所以就郁手整甜品食，呢個Crème brûlée 都想整好耐 o架喇，不過一直都無買到淡忌廉，所以一路都無整，直到最近荃灣間二德惠買嘢有雙倍積分，加上 200ml 裝嘅淡忌廉又做緊特價，$45 / 3盒 (依家 $44 / 3盒 o添咋 )，所以就起心買喇，咁依家咪整到 Crème brûlée 囉！

        材料同做法都好簡單。

材料：
蛋黃        2隻
淡忌廉    125克
豆漿        125克
砂糖        20克

以上材料可做 2 - 3杯燉蛋

- 先用 180°C預熱焗爐。

- 蛋黃同淡忌廉用蛋拂拌勻，然後加入少量豆漿再拌勻。

- 將剩低嘅豆漿煲滾，加入砂糖煮溶。

- 將熱豆漿逐少逐少拌入忌廉蛋液裡，之後再倒回煲內加熱。

- 加熱後嘅忌廉蛋液過篩倒入疏乎厘盅內，然後放上焗盤上，再倒凍水入焗盤內，
  水嘅高度約半 cm至 1cm。

- 放入焗爐，焗 25分鐘後取出放涼，之後放入雪櫃雪10分鐘。

- 喺雪凍咗嘅燉蛋面灑上少少砂糖 (份量以外)，用火槍將砂糖燒焦，做成焦糖，咁
  就食得啦！

食譜參考：香港電台嘅美食DIY 網頁 (仲有導師整個製作過程嘅 video睇 o添呀！)

 

        啱啱出爐時果樣，可能因為個焗爐太勁，未做焦糖都已經焦咗少少。

 

        本來星期一果日係想問 Louisa 借定支火槍嚟燒焦糖，不過一來佢無 gas；二來我其實又驚驚哋用火槍，因為見到個火噴得咁猛，覺得好恐怖、好危險；三來佢又話俾我聽可以用焗爐焗燶啲砂糖，所以我就試吓入焗爐，淨用脆烤功能果三枝石英管嚟焗脆個表面，睇吓得唔得，但其實係唔得囉！焗咗好耐都只係得少少燶，而且我隔住爐門望入去時，見到啲燉蛋猛咁喺度郁，滾吓滾吓咁，好驚會焗過龍，焗到啲燉蛋老哂兼嚡口，最後都係放棄罷！所以喺燉蛋面會見到啲白色未溶嘅砂糖結晶。

 

Notes：

1. 原食譜係用牛奶而唔係豆漿，只係因為小弟唔飲奶啫。

2. 將煲滾嘅豆漿 /牛奶倒入忌廉蛋液時，一定要慢慢逐少逐少拌入，如果唔係啲蛋
    液就會被煮熟。

3. 忌廉蛋液心須過篩倒入疏乎厘盅內，因為可以隔咗啲被煮熟咗嘅蛋液固體，令
    到啲燉蛋更幼滑。

4. 焗好出爐嘅燉蛋一定完全攤凍或雪涼，否則當灑上砂糖製作焦糖時，熱力會將
    砂糖溶化入燉蛋內，咁就最唔成焦糖喇。

 

P.S. 

1. 當 Louisa 話枝火槍無 gas時，我就問佢係用咩 gas，佢話用打邊爐果啲 gas，
    咁就再問佢，咁打邊爐啲 gas喺邊度買得到，佢竟然同我講：「打邊爐啲 gas
    咪喺 賣打邊爐啲 gas嘅地方買囉！」跟住我哋兩條友就喺度勁笑，真係俾佢吹
    漲！

2. 用上次買返嚟嘅腐皮碎整豆漿真係好方便，十零廿分鐘啲腐皮已經煲溶哂，做
    成好濃嘅豆漿，我將食譜用剩嘅豆漿俾咗老豆飲，佢話好濃好甘香喎！