今日係母親節，首先喺度同天下間所有母親講聲「母親節快樂！」
雖然係母親節，但今時今日，我都已經唔可以再為媽咪做啲乜嘢，唯有送上一枝康乃馨，代表我對佢嘅一份心意，相信如果媽咪感應到的話都會好開心，絕對唔會介意只係一枝小小嘅鮮花，只要知道佢永遠都留喺我心中就得喇。
呢個花樽係我讀小學時買嚟送俾媽咪嘅，雖然唔係啲咩名貴嘢，但媽咪就好歡喜、好珍惜，一直都包起佢唔捨得用。
其實我知道媽咪係好珍惜我同阿馳送俾佢嘅每一樣嘢，即使係我哋細個時所畫嘅一啲好有 "藝術氣質" 嘅畫，佢都會 keep 起留念。喺佢離開咗之後，有次我執嘢時無意中俾我發現到呢本簿：
原來喺呢本簿裡面係貼滿哂我同阿馳曾經送過俾佢嘅嘢，如果係啲大件嘅物品，好似呢個花樽咁唔可以貼喺本簿度嘅，媽咪就會影低張相，將佢貼番落本簿度，然後加上註釋。當我每次翻開呢本簿嘅時候，我啲眼淚都必定會不由自主地係咁流，因為真係覺得好心痛 …………
你既心情我非常明白,你既感受同我一樣,唉 !希望d有媽咪既人好好咁愛護媽咪,珍惜同媽咪既每一分鐘 !!!!
回覆刪除[版主回覆05/12/2009 00:34:00] 所以我成日都覺得果 啲對媽咪唔好 嘅人，真係唔識珍惜！ 點呀，妳對寶貝仔女點同妳慶祝母親節呀？