椰汁紫米露

        噚日 dayoff 比較得閒，最好就係整嘢食啦！

        呢個係一個非常簡單容易整嘅甜品，以前媽咪間唔中都會整嚟食。不過有次見佢整完出嚟之後，我覺得好奇怪，點解會加咗啲粟米落去嘅？不過，不單只顏色靚咗，唔係淨係 "黑掹掹" 一碗糖水咁單調，多咗啲金黃色喺裡面，靚咗好多，而且食落口又會多啲 "o趙頭 "，都幾特別，所以自此之後我每次都跟媽咪咁樣整喇！

材料：
黑糯米
罐頭粟米
冰糖
椰漿
粟粉

- 黑糯米洗乾淨，用清水浸一個鐘。 

- 煲滾水，將黑糯米放入，煲約 15 分鐘後就可以放番入個真空煲度。

- 約 3個鐘後，拎番出嚟煲番熱。

- 另外，將冰糖加水煲溶成糖水，然後倒入紫米露裡面一齊煲滾。

- 與此同時，用椰漿將粟粉拌勻，等到紫米露煲番滾之後就倒埋入去一齊煲，記得
  邊煲邊攪拌，以免粟粉受熱凝固結塊，再次煲滾就有糖水食喇！。

        你哋鍾意邊個賣相多啲呢？