見到網友 Motonako.A 成日都整 muffin 整得咁開心，Louisa 又借咗個 muffin 模俾我，於是興到就整呢個紅莓合桃鬆餅囉！
材料：
中筋麵粉 83克
泡打粉 1/6茶匙
橄欖油 50ml
砂糖 50克
雞蛋 1隻
椰漿 35ml
紅莓乾 適量
合桃 適量
以上材料份量可做約 5個鬆餅
- 合桃洗淨、用抹手紙索乾水份後，放入已預熱 180°C 嘅焗爐內焗 6 - 8分鐘至香
，出爐稍為攤凍後就將佢剪成細粒。
- 將橄欖油同糖混合，用電動打蛋器打勻。
- 麵粉同泡打粉過篩 3次，然後加入牛油、糖混合物裡面，用打蛋器拌勻。
- 加入椰漿同雞蛋拌勻。
- 最後加埋紅莓乾同焗香咗嘅合桃碎落去，繼續用打蛋器以慢速攪拌至所有材料完
全混合。
- 將麵糊倒入已放有紙模嘅焗盤內， 放入焗爐，用180°C 焗約 25分鐘至熟。
你睇，啲 muffin 焗到金黃色，幾靚！仲有好靚嘅裂紋 o添呀！真係拍得住 Motonako.A 啲 muffin 喎！(發夢咩，人哋 Motonako.A 係 muffin 專家嚟 o架嘛，你個初哥點夠人揮呢！
貪得意另外整咗幾個 mini size嘅 muffin，我見咁細個，諗住應該都唔駛用咁猛火焗同唔駛焗咁耐，所以我呢次就用160°C 焗10分鐘，睇吓效果點，但原來係唔 OK 囉！裡面已經焗到熟哂，表面都仲未變金黃色，本來諗住再焗多一陣，結果都係無咁做，驚住會焗到好乾硬。
Notes：
1. 原食譜係用牛奶整嘅，但係我呢個唔飲奶嘅人當然唔用奶啦！反正整完椰汁紫
米露仲有椰漿剩，咪用佢嚟代替奶囉，食落口一啲椰汁味都無 o架！
2. 唔知點解次次整 muffin 都唔係完全好鬆，可能係最尾拌入紅莓乾同合桃碎時一
時貪方便，就咁用膠刮攪，無用到電動打蛋器所致。點解我會咁諗？因為睇
個網上 video 時，個導師係全程都用電動打蛋器攪拌，加上我唯一一次能夠完
全將個蛋糕整到好鬆嘅 香蕉蛋糕，就係全程都用電動打蛋器攪拌喇，睇嚟真係
完全唔可以偷懶貪方便喇！
3. 最好用個比較深少少嘅兜嚟攪粉，如果唔係一開個打蛋器時，啲粉就會飛到周
圍都係，有排你執手尾！！
MINI MUFFIN都可以用番180度焗10分鐘咁就好金黃靚仔喇！160度似乎低溫左D。
回覆刪除[版主回覆06/03/2009 14:19:00] 係啦，無經驗呀，慌死會焗 燶咁！ 多謝 Kelly 妳 嘅 advice，下次我就識點焗啦！ 係呢，妳覺得我整 嘅 muffin 唔鬆，會唔會係我估果個原因呢？
焗爐溫度當然係一個問題，不過我覺得材料比例緊要d。
回覆刪除另外，我覺得用液態油都會冇咁鬆架...特別係凍左之後。
[版主回覆06/03/2009 14:41:00] 嗯，乜原來用液態油會差 啲 o架？我見過導師都 suggest 用粟米油咋！ 至於材料比例，我係跟足佢個 recipe o架，不過因為佢寫住可做 15 個 muffin 咁多，所以我咪將所有材料都除開3， 諗住淨係試做 5個 囉，咁會唔會因為份量少而有影響呢？我成日都覺得硬係自己唔係好識用膠刮去做攪拌，用個電動打蛋器會做得鬆好多，是嗎？
又唔可以話係差既，muffin係quick bread，用液態油係合符quick既原則。只不能muffin同cup cake好似，而家大家都分唔開一律叫muffin喇。
回覆刪除你按比例遞減冇錯架，焗既時間係就要睇自己個爐溫同蛋糕大小調整啦，整多幾次就會掌握到。
用電動打蛋器係方便，不過我通常都用刮刀mix，怕電動打蛋器打到出筋，而且刮刀可以刮得乾淨d嘛！
[版主回覆06/03/2009 23:08:00] 呀，話時話，我真係攪 咗好耐都唔知點分 muffin 同 cupcake，我淨係知道 cupcake 係細個 啲 ，同埋個面會有 decoration ，至於材料同做法就真係唔知有咩分別喇！ 咁點解我每次用電動打蛋器就成功做到妤鬆呢？ So curious ！
大哥呀~~我並唔係咩專家呀，你咁講人家當真嘅就幣架喇 大家研究吓就冇問題嘅.....睇倒你嘅做法又真係同我有啲唔同噃 1) 我会用高筋粉代替中筋粉 2) 我会用梳打粉代替泡打粉 3) 用菜油代替 橄欖油 4) 唔鈡意奶可以唔落，椰汁比較冇咁滑囉，其实落奶...整好之後你都唔会 feel 倒有奶味囉，除非你係敏感奶類喇。 5) 做法次序..我会將糖及蛋先打好，然後再加入所有粉類用切拌式拌勻 我係用全人手攪拌的..完全冇用機嚟攪，效果好好... 有機会試吓吖....真係好鬆軟架！
回覆刪除[版主回覆06/04/2009 01:14:00] 好，下次又試 吓妳個方法先。
咁即係將妳講果 啲材料全部取代哂就 OK？咁油幾時落呢？同樣材料，唔同次序落都會有影響？
其實乜 嘢係菜油呢？我以為所有用植物提煉出 嚟 嘅油都叫做菜油 o添！