2011年11月26日星期六

洛神花裸麥麵包 Light Roselle Rye Boule

買咗 Grégoire Michaud Artisan Bread 包教室 》咁耐都未跟佢整過,因為裡面大部份嘅麵包都要用到發酵麵種去整,預備麵種都唔係咩咁大不了,最煩係佢嘅麵種係要整足幾日,仲要不停加入新粉,你都咪話唔煩呀!


 


早兩個星期喺圖書館度借到佢本新書《古風歐陸麵包》,今次呢本講明係 “baking at home”,所以食譜簡單好多,一般家庭都可以做得到。睇哂成本書之後,我就揀咗洛神花裸麥麵包呢個食譜,因為咁啱屋企有樽洛神花果醬嘛,難得咁特別嘅食材都會有,唔試整都真係對唔住自己啦!






 


材料:
高筋麵粉      150
裸麥粉
           75
即用酵母
       1
發酵麵種
       50
海鹽
       6
洛神花果醬
   50
   
180


- 所有材料放入食物處理器內攪拌混合,逐少加水搓成麵糰。



-
拎出麵糰,放上已灑粉嘅枱上,繼續搓揉及摔打成光滑麵糰。



-
將麵糰滾圓,放入已灑粉嘅兜內,用保鮮紙包好,發酵 2 個鐘。



-
麵糰排氣後再次滾圓,鬆弛 15 分鐘。



-
再次排氣及滾圓,將麵糰倒轉放入已灑粉嘅發酵藤籃內,發酵 90 分鐘。



-
發酵完成後,用刀喺麵糰表面割紋,然後用水噴濕麵糰。



-
放入已預熱至 210 °C 嘅焗爐內焗約 35 分鐘。


-
其間當麵糰開始上色時再噴多一次蒸氣。

食譜出自 Grégoire Michaud 嘅 《古風歐陸麵包》。









今次個紋路做得好滿意,可惜個做形就歪歪哋,
可能因為放個麵糰落藤籃時放得唔夠正中。







唔單只無乜紫紅色睇到,就連食落口都無乜洛神花果醬味,
有少少失望!




Notes


- 原食譜係用 65 號麵粉

- 發酵麵種可參考燕麥包中嘅老麵製做法。



你哋亦都可以喺 Facebook Fans Page 度搵我 o架,我間小店叫做 La Cucinadi Kestrel 呀,快啲 click 入去做我個 fans 啦!


8 則留言:

  1. 我成日怕整包, 最關鍵就係要等佢既發酵時間..一次又一次...同埋搞唔清yeast同麵粉既比例...你又唔放過d洛神花啦..wakakaka...
    [版主回覆11/28/2011 18:18:23]我又唔怕喎,因為放低佢喺度自生自滅咁發酵,都唔駛理佢,跟住就清洗用具,之後就做自己嘢,尤其我鍾意整歐陸包,多數都唔駛落油,乾手淨腳,真係好過整糕餅多多聲,仲健康兼飽肚 o添!……yeast同麵粉既比例咪跟食譜一樣囉,唔駛自己判斷!……唔係,只係咁啱食譜同果醬都有喺手啫!……妳快啲整包啦,等發酵時間咪做其他嘢,有其他寄托,眨吓眼已經發酵完喇,唔駛喺度呆等呀!

    回覆刪除
  2. 之但係yeast又有好多種呢....我睇到一頭霧水啦....完全冇概念 , 唔知用邊隻...同埋係咪要事先加入暖水度+糖, 等佢出泡再加入麵粉度呢...
    [版主回覆11/30/2011 19:49:50]快啲搭好條筋啦,妳有機搓,唔駛人手搓,易過我整好多o架喇!等妳傑作出爐喇!
    [毛豆回覆11/29/2011 14:54:28]多謝..多謝..明白...等我盡快搭0岩條筋,的起心肝搓包...
    [版主回覆11/29/2011 00:04:48]妳睇番我之前篇《不同種類酵母用量之調整》( 喺入廚小貼士一欄內 ) 啦,我有寫到點樣去換算唔同種類酵母嘅用量。……如果妳用一般乾酵母的話,係要先加入暖水同糖裡邊約 10 分鐘,等佢再次 activated 先可以再用。但我自己就用 "即用酵母",因為唔駛做呢個步驟,可以直接加到材料中一齊混合,方便好多。但睇過書講,話用即用酵母做出的成品,小麥香味散發得唔夠普通乾酵母勁,我個 friend 就話用新鮮酵母整麵包就最香、最軟,所以好多大師都係用新鮮酵母,但我個 friend 俾過我睇,會有一 "朕" 微微 "酸縮" 味,而且好似話會容易失效,所以都係用即用酵母就最方便。

    回覆刪除
  3. 呢本書我都未開工,又買了幾本新...c未...
    [版主回覆11/30/2011 19:48:32]哈哈,好多人都係咁,買好多書但又未整過,所以我唔會買書,只會喺圖畫館借,慳錢又慳位,正!

    回覆刪除
  4. 好耐冇整過天園boule了, 冬天到了, 又係慢發酵的時候了.
    [版主回覆11/30/2011 19:47:17]其實我都唔係好知Boule呢個字點解,都係跟書寫咋!……冬天我係將個麵糰放入電飲煲度,開保溫至40°C嚟發酵o架,我無咁好心機慢慢等!

    回覆刪除
  5. 呢個好得咁噃....睇落裏面好軟熟咁, 不過我冇洛神花噃....點算?
    [版主回覆11/30/2011 19:44:45]無洛神花果醬?唔緊要,用其他果醬整應該無問題o架,反正洛神花果醬個味都唔係太出,用橙醬整應該好正呀!

    回覆刪除
  6. 呢本書我都有,不過係買架呢....hehe
    書就有但人好懶,做包要用好多時間!
    [版主回覆12/05/2011 18:42:23]係囉,有時真係好多嘢都想整,不過懶蟲上身就真係唔多想整喇,尤其依家天氣咁凍,一諗起之前之後都要濕水洗嘢,就更加唔多願整囉!

    回覆刪除
  7. 呢個包包有無洛神花味呀?
    [版主回覆12/05/2011 18:44:02]講真,真係唔係好食得出,唔知係本身樽果醬味道唔夠濃呀,定係呢個包係無乜洛神花味呢?

    回覆刪除
  8. boule即係ball, 慢發酵味道唔同快發酵噃, 田園包朕除係慢發酵好d.
    [版主回覆12/09/2011 15:46:32]哦,原來咁解,又袋錢落袋喇!……咁我又唔係用勁高溫,只係唔想依家咁凍發得超耐時間,溫度太約都只係40°C左右。因為我好多時都係即刻食出爐麵包當lunch,之後就要趕住出門口返工,所以唔可以等太耐呀!

    回覆刪除