日式紅豆餡 Azuki Bean Filling

        紅豆餡或紅豆沙都係我一直想整好耐嘅嘢，所以都已經放咗喺個 To Do List 裡面好耐喇！但因為人懶，成日都唔想郁手整，但噚日卒之的起心肝郁手整喇，因為今日我要用到呢個餡去整嘢嘛！

材料：
紅豆      300克 (即半斤)

糖          150 – 180克

鹽         1/8茶匙
水          適量

- 先將紅豆洗淨，放入煲內並加水至蓋過紅豆面，煲滾。

- 煲滾後，加入 200ml 水繼續煲，煲滾後再煲多 3 分鐘。

- 熄火，盛起紅豆，倒去煮豆水，再次重覆以上步驟一次。

- 熄火後將紅豆盛起並沖洗，之後再放番入煲內加水，用大火煲滾。

- 煲滾後轉細火煲 1個鐘至豆腍。

- 舀起表面泡沫之後，加糖同鹽，拌勻，煮至適合濃稠度。

食譜係嚟自櫻井景子嘅《和菓子‧和甘味》(秋冬篇)

 

如果你都好似我咁有真空煲的話，你可以考慮用我呢個方法，比較方便容易：

- 先將紅豆洗乾淨，用水浸過夜。

- 煲滾水，倒入紅豆，大火煲到滾番之後，就轉中細火煲多 15分鐘。

- 之後轉番大火煲半分鐘，就可以將內鍋放入真空煲度。

- 約三個鐘後，將內鍋放上火煲番滾 ( 如果水太少的話可適量加水 )。

- 加入糖同鹽後，轉中細火繼續煲，煲至適合濃稠度就完成。

 我今次一次過煮多一倍份量，攤凍紅豆餡後用膠盒裝好，放上冰格
儲存，到有需要用時就前一晚拎返落下格解凍，方便好多。

Notes:
- 浸紅豆時，記得用個大啲嘅容器，因為紅豆會吸水並發脹到兩倍以上大小。

- 到最後步驟將紅豆煮成蓉時，記得不時攪拌，以免黐底。而且可以將紅豆略壓將
  豆沙壓出。

- 今次我就用 180 克糖去煮，雖然就咁食就非常之甜，但因為我會用嚟整冷凍食
  品，到時甜味就會減低，所以要因應個人口味增減糖嘅份量。

- 櫻井老師喺書中曾提到中式紅豆沙同日式紅豆餡可以互用，但我個人就比較喜歡
  日式紅豆餡，因為無任何油份，無咁膩；而且保留豆粒，更有 o趙頭！