泰式青咖喱雜菜

        之前Louisa 去煤氣烹飪中心跟 Rachel 學煮青咖喱，Rachel 預先準備好自製青咖喱醬分派俾每位學員，因為佢唔見我去上堂，所以落堂後同 Louisa 講，佢可以分部份咖喱醬俾我試試，當然，Louisa 一早都有咁諗啦，所以我都分到小量青咖喱醬呀！真係好開心呀，佢哋兩個都咁有我心，所以喺呢度我都要同 Rachel 及 Louisa 講多次多謝！

        原本 Rachel 係教用青咖喱醬煮雞嘅，不過噚日我就用咗嚟煮雜菜，一樣咁好味！梗係啦，呢個菜式嘅靈魂青咖喱醬都唔係我整，係由 Rachel 整 o架噃，幾差嘅食材都可以大變身啦！所以好食絕對唔係因為我煮得好囉！

材料：
椰菜
豆角
豆腐卜
泰國圓茄
泰國小茄
檸檬葉
金不換

調味料：
椰漿
清雞湯
魚露
糖

經典泰國菜食材：金不換、泰國小茄、泰國圓茄同檸檬葉。

- 椰菜洗淨切件；豆角洗淨切段；豆腐卜沖水後對切一半；圓茄洗乾淨，切開 4
  瓣。

- 金不換、小茄及檸檬葉洗淨備用。

- 燒熱油鑊，爆香青咖喱醬及檸檬葉，然後倒入椰漿同清雞湯，煮5分鐘。

- 加入圓茄及小茄子，冚上鑊蓋煮至半熟。

- 加入豆角同豆腐卜，加小量水，冚鑊蓋煮腍。

- 將椰菜加入，灑上魚露及糖，兜炒一陣，椰菜軟身便可。

- 最後加埋金不換，兜炒幾吓就即刻熄火，上碟。

        一碟又香又惹味嘅雜菜，簡直係將平凡嘅蔬菜都變得好吸引，唔鍾意食菜嘅朋友，相信都會讚不絕口！當然，都要接受得到這種重香料嘅東南亞口味呢！

Notes:
- 糖嘅份量可以落多少少，因為本身味道都已經好夠鹹味。

- 金不換一定要最後先好落，落咗之後就唔好再煮太耐，因為煮得太耐會無哂香
  味。