親子丼 Oyadon (Dedicated to my dearest Mother)

       第一次食親子丼係好耐好耐之前喇，應該係十幾年前喇，果陣時仲係喺琴行教緊琴，同埋其他 Miss 一齊去商場內一間日式食肆度食嘅。

        點解十幾年後嘅今日會想自己整嚟食呢？睇篇 blog 個 title 都知啦，係送俾媽咪㗎嘛！呢個飯點解會叫做親子丼呢？原因係因為呢個飯係用雞肉 (親) 同雞蛋 (子) 做囉！所以亦都話俾你聽，點解我會喺呢個時候煮呢個飯囉！

 

材料：
珍珠米         適量
雞扒             約50克
洋蔥 (細)      一個
蛋                  1隻
壽司紫菜      少許

醃料：
鹽                  1茶匙
胡椒粉          少許
清酒              少許

調味料：
一番汁          50毫升
醬油              1湯匙
味醂              1湯匙
清酒              1湯匙
糖                  1湯匙

- 先將雞扒去皮，然後切粒，用醃料醃好備用。

- 洗好米煮飯。

- 洋蔥去皮後切條。

- 將調味料煮滾後，先放雞肉落去煮。

- 當雞肉煮到約八成熟時，就加入洋蔥，繼續煮。

- 洋蔥煮至軟身後，將雞蛋拂打成蛋液，然後倒埋落洋蔥雞肉度，冚蓋，轉慢火煮
  多一陣。

- 勺飯入大飯碗內， 然後將紫菜撕成塊，均勻放喺飯面上。

- 最後將洋蔥雞肉放上飯面，大功告成！

雞肉滑、洋蔥甜、雞蛋香、米飯軟糯，好味呀！

 

加埋一碗大豆芽豆腐蜆肉麵豉湯，
就係豐富嘅日式晚餐。

 

Notes：
- 如果食得辣的話，可以灑上七味粉，風味更好、更惹味。

- 如果用專煮丼飯嘅淺鍋煮材料會更加方便，因為當材料煮好後，會比較容易將佢
  倒落飯面度。我自己已經係用個細煲 ( 只有1 公升容量 ) 嚟煮，但係將材料倒上
  飯面時都有一定難度。

P.S.  如果有學古典音樂嘅朋友都應該知道，好多時作曲家都會喺個音樂標題下面注明樂曲係送俾邊個，今次我都 adapt 咗呢個 idea，將 "獻給親愛的媽媽" 寫喺標題隔離。