2016年2月14日星期日

泡菜蘿蔔海帶湯

        早幾日煮咗個韓式泡菜湯,因為新正頭買餸唔方便,所以最好就係用啲屋企本身已有儲備嘅食材,加上依家買菜貴都阿媽都唔認得,買白蘿蔔就最啱,又平又合時,正所謂冬食蘿蔔夏食薑,中醫角度天冷食白蘿蔔對健康有益㖭!加幾隻韓國生蠔,夠哂美味喇!!
 
        原本一心係買豆腐整嘅,不過初三嗰日街市好多檔口都未開,而且我教完琴都已經夜,有開檔嘅豆腐檔都已經買哂,咁就唯有改用初一煮南乳齋用剩嗰棵津菜代替啦!
 
 

 
材料:
韓國海帶
白蘿蔔
洋蔥
豆腐
蔥段
泡菜連醃汁

調味料:
韓國辣椒醬
魚露

- 海帶用清水浸發,洗淨後略剪斷;蘿蔔刨皮、切件;洋蔥去衣後切粗條;豆腐切件。

- 先將蘿蔔、洋蔥同豆腐凍水落煲,煲滾後轉中慢火煮至蘿蔔腍身。

- 之後加海帶,再煮 10 分鐘,加入泡菜同蔥段,滾多 5 分鐘。

- 加入適量調味料,拌勻即可。
 
 
早幾日有素友教我,話響鈴如果唔想打邊爐時食的話,
嚟蘸湯食都一樣滋味,咁我就一於試吓,咁
大盒響鈴自己一個人食,麵都唔使煮囉!
 





響鈴係 Ernest 婆婆俾我,係佢早前入開大埔玩時
順手買嘅,「樹記」自從搬咗入大埔之後真係
好唔方便,即使有送貨都無用,腐竹
產品點買到幾百蚊咁多至得點㗎!!



10 則留言:

  1. 您一次食哂一合,比我要飲涼茶了。

    回覆刪除
    回覆
    1. 係呀,當飯食,又無煮飯麵喎!

      點解要飲涼茶咁誇張?

      刪除
  2. 我覺得響鈴比較多油,怕多食。樹記的OK嗎?

    回覆刪除
    回覆
    1. 嗱,其實我自己由細到大都唔多好煎炸食物嘅,食乜都係會覺得有油膩感,但客觀咁睇,「樹記」呢個算係唔錯,好清爽,只係因為我食哂成盒咁多,食到尾就覺有點膩囉,不過蘸完湯之後啲湯都係無乜油㗎,同埋我咁易痾食咗都無事喎!

      刪除
  3. 新年真係比較難買餸呢,想煮飯真係要用存貨~~
    一次食晒一盒響鈴唔會覺得好油嗎?

    回覆刪除
    回覆
    1. 唔太覺呀,妳睇番我回覆 sawwei 就知喇!

      刪除
  4. Kestrel, 我嗰邊街市,我去開嗰幾檔,全部未開 搞到我去其他檔口買,但啲嘢唔係咁靚

    回覆刪除
    回覆
    1. 係囉,所以我習慣咗年尾嗰幾日就會買定少少存貨㗎喇!

      刪除