泡菜蘿蔔海帶湯

        早幾日煮咗個韓式泡菜湯，因為新正頭買餸唔方便，所以最好就係用啲屋企本身已有儲備嘅食材，加上依家買菜貴都阿媽都唔認得，買白蘿蔔就最啱，又平又合時，正所謂冬食蘿蔔夏食薑，中醫角度天冷食白蘿蔔對健康有益㖭！加幾隻韓國生蠔，夠哂美味喇！！

 

        原本一心係買豆腐整嘅，不過初三嗰日街市好多檔口都未開，而且我教完琴都已經夜，有開檔嘅豆腐檔都已經買哂，咁就唯有改用初一煮南乳齋用剩嗰棵津菜代替啦！

 

 

 

材料：
韓國海帶
白蘿蔔
洋蔥
豆腐
蔥段
泡菜連醃汁

調味料：
韓國辣椒醬
魚露
鹽

- 海帶用清水浸發，洗淨後略剪斷；蘿蔔刨皮、切件；洋蔥去衣後切粗條；豆腐切件。

- 先將蘿蔔、洋蔥同豆腐凍水落煲，煲滾後轉中慢火煮至蘿蔔腍身。

- 之後加海帶，再煮 10 分鐘，加入泡菜同蔥段，滾多 5 分鐘。

- 加入適量調味料，拌勻即可。

 

 

早幾日有素友教我，話響鈴如果唔想打邊爐時食的話，

用嚟蘸湯食都一樣滋味，咁我就一於試吓，咁

大盒響鈴自己一個人食，麵都唔使煮囉！

 

盒響鈴係 Ernest 婆婆俾我，係佢早前入開大埔玩時

順手買嘅，「樹記」自從搬咗入大埔之後真係

好唔方便，即使有送貨服務都無用，腐竹

產品點買到幾百蚊咁多至得點㗎！！