橙汁蜂蜜雪芳蛋糕 Orange Honey Chiffon Cake

         幾個禮拜前上網睇 HKTV 一個清談節目，節目臨完結之前，主持人劉玉翠介紹咗嘉賓周家怡睇一本書，書名係《愛他也要愛自己》，周家怡當堂即刻喊哂，眼淚完全不受控制。係咪我其實都要搵下呢個世界會唔會有本書叫做《對人好也要對自己好》呢！？睇完之後可能就唔會再俾你哋話我要學識對自己好啲、要錫自己多啲，唔好淨係顧住人感受，我諗我依家會更加清楚知道，當年媽咪話我「只會窮自己而唔會窮人哋」呢句說話嘅真正含意！

 

        無工開，無嘢好做，就自自然然會諗好多嘢，的確，教緊學生、做緊家務、上緊網時係完全無機會俾自己去諗嘢。好啦，就學你哋咁講，得閒就整吓嘢食，唔好俾自己個腦咁 "得閒"！

 

        有日無聊拎起本《我愛和風洋菓子》嚟睇，見到個橘子蜂蜜戚風蛋糕食譜，咁啱早兩日十五又將供過佛嘅橙換咗落嚟，咁就索性整呢個蛋糕啦！橘子蜂蜜我就無喇，只係用老竇拎番嚟嘅蜂蜜，係佢個農場 friend 自家出品，同埋部份低筋麵粉我都用咗全麥麵粉代替。

 

 

材料：
低筋麵粉      50 克
全麥麵粉      30 克
蛋黃             3 個
橄欖油         20 毫升
蜂蜜            40 克
橙汁            60 毫升
橙皮茸         1 個橙份量
蛋白            4 個
糖                30 克

- 麵粉過篩 2 次。

- 用膠刮將蛋黃打散，之後依序拌入橄欖油、蜂蜜、橙汁及橙皮茸。

- 篩入粉類，均勻攪拌成麵糊。

- 蛋白用電動打蛋器打至起泡，之後將糖分 3 次加入，打成八成企身嘅蛋白霜。

- 先將 1/3 份蛋白霜加入麵糊內，用膠刮拌勻後將剩低嘅蛋白霜分次輕手拌入。

- 將麵糊倒入模內，然後喺枱面輕敲數下，釋出較大氣泡。

- 放入已預熱至 180 °C 嘅焗爐內焗約 30 分鐘，出爐後立即倒扣攤凍。

- 脫模後即可享用。

以上材料份量可做直徑 17 厘米蛋糕 1 個。

 
食譜參考自福田淳子嘅《我愛和風洋菓子》。

近排又試再次越食越甜，自己都覺得有啲失控，

所以都已經決定咗要搵專業人士幫手喇，

費事身邊人個個擔心啦！

其實今次我都算係好叻㗎喇，兩、三個禮拜已經將

件事放低得七七八八，不過最衰就係因為工作

嘅關係，個個禮拜都要去番 "案發現場"，

望到相關景物時都好難唔諗番起。