素烤鴨沙律

        近排其實無乜動力做嘢，乜都唔想做，連瞓都唔想瞓。但唔煮又無得食，尤其係夜返嘅時候，隔夜餸就變得好珍貴，唔使煮，翻熱就即刻可以食，所以習慣咗一餐煮埋兩餐食，幾唔想整都係要整！

 

        好彩天氣開始熱，買啲生果蔬菜整沙律都可以，只需要洗洗切切，唔使開火煮食已經慳番唔少功夫，連鑊同煲都唔使洗！整緊蔬果嘅同時，放件素烤鴨入焗爐焗到個面脆卜卜，之後再灑上焗香咗嘅花生同椰絲，攪掂，好好醜醜又一餐！

 

 

我成日都覺得，即使係食隔夜餸，點差極都唔差

得過出街食垃圾、食致癌物啩！

話就話係素烤鴨，但煎或焗香脆個麵筋表面，食落口

個口感同味道都真係似燒豬多啲，就算係齋舖、

佛寺同道觀，都一樣用佢嚟做素乳豬。

話明係沙律，當然個沙律汁先係最重要啦，

無咗佢，咪即係食新鮮蔬果！