拍黃瓜木耳涼拌粉皮

        其實想整呢個冷盤好耐㗎喇，不過有時又要趁某啲食材未到期之前要先整咗佢，有時就因為餸菜配搭關係就唔到。好喇，時機到喇，買好哂料整，天氣就即刻變得咁清涼，真係俾佢激死！   

        整涼拌青瓜都唔係第一次，但係用木耳整涼菜都真係首次咋！估唔到木耳原來都好容易索味，加埋爽脆口感，超好食喎！

 

材料：
青瓜
木耳
粉皮
炒香芝麻

 

調味料：
糖
蒜茸
薑茸
魚露
鎮江醋
辣豆瓣醬
花椒粉
麻油
水

- 木耳浸發後洗乾淨，剪去硬蒂，放入滾水內，加少少白醋煮熟，盛起後用食用水過冷河。

 

- 青瓜洗淨後切去頭尾，略刨皮，之後放入食物保鮮袋內，用刀拍散。

 

- 將瓜瓤切去後切細件，放入筲箕內，均勻灑上鹽，用手拌勻後醃 30 分鐘。

 

- 青瓜醃好之後用食用水沖洗，將多餘鹽份洗去，然後榨乾水份。

 
- 粉皮放滾水內煮至腍身，盛起後用食用水過冷河，備用。

 

- 將所有調味料拌勻，酌量加水調至適合濃度，加入木耳及青瓜拌勻，醃兩個鐘或以上
  至入味。

 

- 碟內放入粉皮，將醃好青瓜同木耳放上，淋上醃料，灑上芝麻即成。

 

 

俾著以前，我只會將青瓜切件算數，因為拍完之後肯定啲
青瓜飛到周圍都係，有排抹廚房！但學識咗將青瓜
放入袋內先拍，咁就唔使怕啦！

 

 
 

記得要用鹽醃青瓜呀！青瓜夠唔夠爽脆
就係靠哂呢個步驟㗎喇！

 

非常好味，青瓜同木耳都好爽脆、又入味，粉皮就
更加唔使講啦，索哂味，超正呀！