香草麵包多士 Mixed Herbs Toast

          唉，你話係咪真係宿命呀，一用番即用酵母加老麵就乜事都無，仲整到個靚靚多士㖭！
 
        而且今日最後發酵時都只係用咗大約一個鐘度咋！平時整嚫麵包多士，閒閒哋都要粒幾兩粒鐘，我睇過本麵包天書之後，知道自己製作過程有問題，依家學識咗點去避免，但最主要原因我諗係酵母問題，因為我唔係成日整包，一星期都只係整一、兩次，包酵母開封後用好耐都未用得完，發酵能力逐漸減弱，所以要好長時間先發酵完成！

 

材料：
高筋麵粉    300 克
即用酵母    5 克
混合香草    適量
鹽               5 克
糖               35 克
老麵           50 克
水               約 160 毫升
橄欖油       10 克

- 將麵粉、酵母、香草、鹽同糖倒入食處理器內混合，老麵剪成細件後加入。

- 逐少加水搓至起筋，之後加油，開機繼續搓成麵糰。

- 將麵糰拎出，放上已灑粉嘅枱面，繼續搓揉及摔打成光滑麵糰。

- 將麵糰滾圓，放入已灑粉嘅兜內，用保鮮紙封好，發酵 45 分鐘。

- 麵糰排氣後平均分割成 2 份，分別滾圓，靜置 15 分鐘。

- 將麵糰壓平，用擀麵棍擀薄、擀長，之後將兩邊摺入，再擀開至與多士模闊度相約。

- 由上至下將麵糰捲起，捏緊收口後放入多士模內，發酵至八分滿。

- 放入已預熱至 180 ℃ 嘅焗爐內，焗約 35 分鐘。

- 出爐後立即移至架上攤凍，切片享用。 

以上材料份量可做 450 克多士 1 條。

 

原本諗住可以頂到角，但最終都唔得，早知就
唔冚蓋由得個麵糰自由發展啦

 

 

 

 

 

 

 

自從喺電視度睇到有營養師教用香蕉蓉代替果醬，
食得更加健康，之後每逢有熟香蕉兼又整咗
麵包的話，呢個配搭就成日出現。

 

 

Notes：
- 老麵做法，請參閱《發酵老麵》。

- 若果用其他酵母製作的話，可參考《不同種類酵母用量之調整》去計算出酵母所需用
  量。

- 唔用老麵製作的話，水嘅用量就會相應增加，亦可用 25 克蛋液去代替部份水。