如何訂閱網誌

        喺 Yahoo Blog 度搬過嚟嘅朋友，你哋熟習點用呢度啲功能未呀？我依家大致上都清楚知道有咩 function，但因為老人癡呆嚴重，好多曾經見過嘅功能，到要用時就完全唔知點去搵番出嚟，搵極都搵唔到，睇嚟都需要一段時間先可以運作暢順。

        相信好多 blog 友之前喺 Yahoo Blog 都應該有「訂閱」呢個習慣，因為實在好方便，可以通過 e-mail知道 blog 友嘅回覆，而且又會列出訂閱清單，方便大家去巡 blog。

         咁喺 Google Blogger 呢度有冇呢個 function 呢？係有㗎，不過就稱為「追蹤」。但係大家要留意，追蹤係分咗兩種嘅方式，一種係 through Google+ 去追蹤，另一種係 through blogger 嘅身份去追蹤。用 Google+ 去追蹤係比較高層次啲，可以用到更多 function，但係有個唔好處，就係要通過 e-mail 先知道對方 update 同回覆，更重要嘅係，呢個追蹤方式係連繫到我自己嘅 gmail 及其他 google a/c，如電郵、相簿等等，個人資料某程度上會被公開，私隱程度相對較低。

        至於用 blogger 身份去追蹤的話，就只會公開你喺開 Blogger account 時所填的資料，個人資料可以相對填少啲，甚至可以 “做假”，始終寫 blog 都係向公眾公開，都唔想俾人知道自己太多真實個人資料吧！仲有一樣好處，就係唔使 check e-mail 都可以知道訂閱 blogger 嘅留言回覆及新文章發表，仲會節錄部份文字及相片俾你睇，全部資料都可以喺 Blogger 資訊主頁上搵到，我自己就覺得方便好多。

        了解清楚後，咁究竟點樣去裝呢兩個功能呢？

Google+ 追蹤：

喺網誌主頁頭頂上的「設計」/ 「版面配置」 / 「新增小工具」/ 「基本」頁上第二個「Google+ 追蹤者」。

Google blogger 追蹤：

喺網誌主頁頭頂上的「設計」/ 「版面配置」 / 「新增小工具」/「更多小工具」頁上第一個「追蹤者」。

 

        兩款訂閱方式都可以同時存在，至於揀邊個方式就 depend on 你嘅個人需要喇！