又去「樹記」入貨

        其實前兩個禮拜先去完「樹記」買嘢，不過因為當時係返工前去買，所以買唔到要放雪櫃嘅嘢，你知啦，啲黃豆製品好易變㗎嘛，萬一中途變壞的話，真係得個拎字，而且佢哋賣嘅嘢都唔平㗎嘛！咁啱今日早收工，趕喺收舖之前去買嘢，放入保溫袋度，跟住就可以即刻拎返屋企喇！ 

 

點解咁夜臨收舖先去買嘢都仲係要排隊㗎！？其實好耐之前媽咪已經去開呢度買豆製品，因為出名好食，但係嗰陣應該唔使點排隊，最多都係等兩、三個度，自從蘇施黃喺電視節目度介紹過之後，就攪到好多人都識去買嘢，之後就開始大排長龍，舖頭仲要專登擺放圍欄俾人有秩序咁排隊，免得影響左右隔離舖做生意！ 
 

上兩個禮拜去先慘呀，晏晝十二點零一點去到，見到條隊十個人都無，以為好開心啦，點鬼知個太陽曬到正條隊，跟住啲職員又唔會快手快腳做嘢，反正都唔憂做，做得慢你哋都會照排隊買㗎喇，所以雖然得幾個人，但都企喺度曬足差唔多半粒鐘，熱到成身汗，真係黐哂線！！之前農曆新年仲勁，可能因為好多人會買嘢煮齋啦，排咗半個鐘至九個字，條龍都無乜點郁過，由街頭排到街尾咁滯，真係人都癲，你估真係唔使錢咩！！最後都係無買到任何嘢就走人，因為要趕住返工！
 

 

早幾日見到 blog 友輕營媽媽又去「樹記」買嘢，話買咗差唔多 $70嘢，
話自己係咪傻咗，老實講，查實「樹記」賣啲嘢唔平㗎，閒閒哋
都過百蚊啦！不過佢哋出品嘅嘢豆香味真係好香濃，
Ernest 媽咪食過我買俾佢嘅枝竹都大讚，
食完都搭我再買。

 

 

 

 

 

 

今次主要係買新鮮豆製品，包括鮮腐皮，
放喺冰格度保存，隨時解凍嚟煮麵，
食齋日就最啱！

 

 

 

 

 

 仲有兩條素雞，一條係買俾 Ernest 媽咪嘅，
另一條過兩日我就會整咗佢，
到時再同大家分享。

 

 

 

 

 

一場嚟到，反正都排咗隊一陣子，當然
唔少得買埋超香豆味嘅枝竹啦！

 

 

 

 

 

 

若果大家行經過舖頭，見到又無乜人排隊的話，就點都要買番一、
兩樣嘢喇，如果唔係都對唔住自己，因為唔使排隊買嘢
已經係賺咗㗎喇，哇咔咔咔咔 ~ ~ ~ ~ 其實好多人
都係買到左一抽、右一抽，係我排一輪隊
都只係買咁少嘢咋！