越南鮮春卷

        早前喺 Facebook 度見到老表 Tony 去越南旅行嘅相，其中有幅相係影咗越南春卷，心諗，佢喺越南食嘅春卷，應該夠哂正宗，夠哂地道啦，所以我就即刻問吓佢啲餡係咩料，有機會就可以跟住做。查實我好早之前已經買定包越南米紙，諗住有時間又 "興到" 的話就試吓整。

        講開越南米紙，原來都唔易買到，搵咗好多地方都無得賣，連屋企附近商場間「營多東南亞超市」都無得賣，好彩最後卒之俾我喺奧海城間「Taste」度搵到。咁啱最近老豆又喺農場度拎咗啲唐生菜返嚟，所以就 "的" 起心肝去整呢個越南春卷喇！

材料：
越南米紙
免治豬肉
唐生菜
紅蘿蔔
木耳絲
粉絲
金不換

醃料：
鹽
糖
魚露
粟粉
油

調味料：
魚露
紹酒
糖

- 豬肉用醃料醃好；生菜洗乾淨後摘去菜梗；粉絲用清水浸軟後洗乾淨。

- 紅蘿蔔刨皮後切絲；木耳絲用清水浸發後洗淨；金不換洗淨備用。

- 煲滾水，放紅蘿蔔絲及木耳絲入內汆水，之後盛起瀝乾水份。

- 燒熱油，放豬肉入鑊炒至半熟，灒酒，加入紅蘿蔔絲及木耳絲兜炒。

- 加入粉絲及調味料，兜炒至粉絲熟透後就將所有材料盛起。

- 米紙放入熱水內浸透，拎出後用抹手紙或毛巾索乾水份。

- 米紙上放上一塊生菜，再喺上面放上一片金不換及適量炒熟餡料。

- 先將米紙底部摺起，跟住左右摺入，之後再向上捲起收口即成。

啲有機生菜又嫩綠、又爽脆，用嚟做呢個春卷非常之夾，
蘸埋個酸辣魚露汁一齊食，學 Motonako.A 話齋，
真係正到無話可說呀！

 

        本來諗住一半就咁食，一半炸嚟食 o架，但係因為放工返到屋企已經好晏，費事再攪咁多喇，如果唔係十點半都未開得飯呀，留番下次先再試吓炸啦！

Notes：
- 浸米紙時唔好浸得太耐，否則會變得太軟身，易爛之餘仲好難包餡。

- 餡料可依個人口味而更改。

- 唔同牌子嘅魚露，鹹味濃度會有所不同，所以調味時記得試味。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！