味噌關東煮

    上次提到，日本料理餐廳「鳥羽名古屋料理」嘅味噌關東煮係大廚嘅首本之作，當日無點到呢個菜，有少少可惜，不過今晚我就試吓自己整。

    原本諗住上 tvb.com 度睇番《大廚出馬》，跟大廚教嘅步驟去整呢個關東煮，點鬼知個 myTV 唔知發咩神經，突然間好多舊片都睇唔到，我咁講，當然係包括埋「鳥羽」呢集啦，真係嬲死人呀！ 咁無辦法啦，唯有靠自己摸索一下囉！

材料：
白蘿蔔
雞扒
雞蛋
蒟蒻芋絲

醃料：
鹽
糖
胡椒粉
蛋白
粟粉

味噌汁料：
赤味噌
一番汁
味醂
清酒

- 雞扒洗乾淨，去皮後切成小件，放入攪拌機內打成肉醬，加入醃料醃好。

- 雞蛋烚熟後剝殼，待用；芋絲略沖水；蘿蔔刨皮後切件。

- 煲滾一番汁，用手將雞肉醬唧成肉丸，放入湯內烚至定形後盛起。

- 將味噌過篩到湯內，拌勻後加入其餘材料，再加埋味醂同清酒，轉慢火繼續煮。

- 將雞肉丸放回煲內一齊煮，當所有材料煮至入味時即可盛起。

其實本來無諗住整呢個菜 o架，不過噚日老豆喺農場度拎咗好多蘿蔔返嚟，
咁梗係最好趁新鮮煮嚟食啦！放最高果條似唔似人參呀！

 

人生中第一次整自家製雞肉丸，可能落得粟粉唔夠，
所以比較難固定靚靚球形。

 

雞肉丸煮咗咁耐都仲好嫩滑，蘿蔔非常清甜，連乜味都無嘅芋絲
都煮到入哂味呀！第一次實驗都已經咁好味，咁「鳥羽」
嘅關東煮咪好食到飛起！？有機會一定要試吓至得！

 

個味噌汁超好味呢，濃縮哂雞肉嘅鮮甜同蘿蔔嘅清甜味道。
剩咗嘅汁我已經留番起，下次加番少少水就可以
用嚟做湯底煮烏冬，一流呀！！

Notes：
- 今次整一番汁時，偷懶無用到木魚花，改為用木魚湯包，咁就唔駛隔渣咁麻
  煩。

- 唔想整一番汁的話，可以用清雞湯代替，但因清雞湯比較鹹，所以要留意味噌
  用量。

- 記得節目內大廚所用嘅係原件蒟蒻，並唔係芋絲。

- 味噌可事先用少量水開勻，之後直接倒入湯汁內。

- 節目中大廚係依日本傳統方式用山薯磨蓉代替粟粉整肉丸。

    你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！