橙香燕麥包 Orange Oat Bread

        喺屋企閉關兩日，完全無落過街，唔駛出街嘅日子，我一定唔會剃鬚，因為我皮膚唔好，所以要俾佢多啲休息。點知今日 Winnie 要拎嘢過嚟俾我，於是就俾佢見到我個鬍鬚 "lut 突" 嘅頹廢 look！


        講番正題先，正如我之前所講，呢兩日無出過街，無買到嘢整 lunch，又唔想餐餐都煮麵食，晏晝煮飯食就更加少之又少，所以就整咗個歐陸包，加杯咖啡，咁就攪掂咗餐晏喇！

材料：
法國麵包粉        120 克
高筋麵粉           100 克
裸麥粉               30 克
老麵                  50 克
鹽                      5 克
糖                     10 克

即用酵母           4 克
水                      約 150 毫升
橄欖油              10 克
橙皮茸              1 個橙份量
燕麥                  20 克
小麥胚芽          10 克
罌粟籽              適量

- 將粉類、酵母、糖、老麵、橙皮茸、橄欖油同水混合，搓成麵糰。

- 然後加入鹽，繼續搓成光滑麵糰。

- 加入燕麥及小麥胚芽，搓到完全混合好為止。

- 將麵糰滾圓，放喺已灑粉嘅兜內，冚好保鮮紙，發酵 1 個鐘。

- 將麵糰拎出，排氣、再滾圓，之後放番入兜內醒發，時間為 30 分鐘。

- 醒發後將麵糰分割成 4 份，滾圓，用水噴濕表面，然後沾上罌粟籽。

- 麵糰放上已鋪入爐防黏紙嘅烤盤上，冚上保鮮紙作最後發酵 45 分鐘。

- 發酵完成後，用利刀喺麵糰表面 "界" 出十字花紋，之後放入已預熱至 200 °C 嘅焗爐
  內，噴蒸氣後焗約 25 分鐘。

 

- 隔 10 分鐘後再噴多次蒸氣。

- 焗好之後放上架上攤凍，完成。

以上材料份量可做直徑 8 厘米麵包 4 個。
 

不單只顏色靚，而且仲有淡淡嘅橙香味，非常吸引！

 

 

麵包花紋裂得好靚。

 

 

 

今次個麵包非常軟熟，好有彈性，而且表面又唔會太過硬，
唔知係咪因為溝咗部份高筋麵粉而唔係全用法包粉，
再加上只係噴咗兩次蒸氣嘅關係呢！

 

Notes：

- 麵包表面要香脆的話，可用埋法國麵包粉取代高筋麵粉。

- 想橙香味更加濃的話，可以加入兩個橙份量嘅橙皮茸。

- 若焗爐無噴蒸氣功能的話，可用噴水壺直接向爐內噴水。