布朗尼 Brownie

        好耐無整布朗尼喇，對上一次已經係年幾前嘅事。上一次嘅布朗尼個 texture 比較實淨、鬆化，今次就用咗另一個食譜，特別之處係烤盤內加水焗，所以成品完全係另一種口感，相對比較濕潤之餘，仲有種入口即溶嘅感覺，真係好特別！

        大家有興趣試試呢個食譜嗎？

材料：
低筋麵粉           40 克
可可粉              10 克
泡打粉              1 茶匙
85% 朱古力      50 克
72% 朱古力      150 克
牛油                  100 克
雞蛋                  2 隻
糖                     50 克
鹽                     少許
橙酒                  1 湯匙
合桃                  100 克

以上材料份量可做 18 厘米方形蛋糕一個。

食譜參考自鄭慧芳、胡玉玲編著嘅《香港人氣甜品》。

- 所有粉類混合過篩 3 次；合桃洗乾淨，用抹手紙索乾水份，切碎。

- 朱古力加牛油隔熱水座溶，拌勻備用。

- 雞蛋、糖及鹽倒入兜內，用拂蛋器打至糖溶。

- 之後加入朱古力牛油隔溶液及橙酒，攪拌至表面有光澤。

- 將粉類篩入混合物內，用拂蛋器拌勻後倒入防黏模內。

- 將麵糊表面刮平，灑上合桃碎。

- 焗盤內加入適量水，將焗模放上盤上，放入已預熱至 160 °C 嘅焗爐內焗 50分
  鐘即可。

- 出爐攤凍後切件享用。
 
 

呢個布朗尼不但朱古力味非常香濃，加埋鬆脆
合桃一齊食， 口感層次一流。

 

 
 
 

因為蛋糕質地比較鬆軟嘅關係，切件時容易散開，所以食譜
提議最好先放入雪櫃雪至定形先再切，但心急嘅我，
仲邊有耐性等呀，攤凍完就即刻切嚟食，所以
你哋會見到切口唔齊整之餘，
仲有蛋糕碎㖭呀！

 
 
 

 

Notes：
- 原食譜只係寫住用朱古力 200 克，並無標明朱古力濃度，以上食譜用上兩種濃
  度朱古力只係個人喜好。

- 原食譜所用嘅酒係杏仁酒或冧酒；而糖嘅份量為 65 克。

- 由於麵糊比較濃稠，所以用拂打器攪拌麵糊比用膠刮更容易攪拌均勻。

- 若果用普通焗模的話，模內需墊上入爐紙。