印尼沙律配黃薑飯

        每年夏天，都總會至少整一次印尼沙律 Gado-Gado，皆因個花生沙律醬實在好食，非常惹味，喺炎熱天氣之下，原本無乜胃口都即刻變得胃口大增！

        記得第一次食呢個 Gado-Gado 係喺 Gordon 屋企食，因為佢媽咪係印尼華僑，好多時都會煮啲地道印尼菜。當時一食之下就即刻愛上，而且好鍾意佢嘅材料可以自由配搭，想用乜材料都得，最緊要係自己鍾意。
 

        今晚除咗整 Gado-Gado 之外，仲煮埋個黃薑飯伴食㖭！       

 

 
印尼沙律

材料：
薯仔
雞蛋
青瓜
椰菜
芽菜
豆腐乾
金不換
Gado-Gado 花生糕

- 蘿仔刨皮後切件，隔水蒸熟；雞蛋烚熟後切開 8 份。

- 青瓜洗淨、去瓤，然後切粒；椰菜切絲後，快手用清水浸洗，瀝乾水份備用。

- 芽菜摘根，沖洗乾淨；豆腐乾洗淨後切粒；金不換洗淨備用。

- 煲滾水，落少少鹽，之後分別將芽菜同豆腐乾汆水，盛起瀝乾水份。

- 花生糕略切碎，放入煲內，加適量水煮開成沙律醬。

- 將所有材料連沙律醬一齊拌勻即成。

 

黃薑飯

材料：
米
黃薑粉
芫荽籽粉
新鮮香茅

- 香茅用刀拍爛，之後切碎成香茅茸。

- 飯煲內加入黃薑粉、芫荽粉及香茅，加適量水拌勻。

- 將米洗乾淨，倒入飯煲內，依一般煮飯方法煮好即可。

 

呢包就係整印尼沙律嘅 Gado-Gado 花生糕喇！

 

 

 

 

材料準備好之後，加入花生醬拌勻就攪掂。

 

 
 
 

印尼沙律配黃薑飯伴食，夠哂東南亞風味！ 

Notes：

- 沙律材料可自由選擇各式蔬菜。

- Gado-Gado 花生醬可在東南亞食材店舖買到。

- 煮花生醬時要用中慢火，邊煮邊攪拌，以免黐底。

- 如果想方便的話，可買現成黃薑飯醬料包，鍾意的話亦可加入椰漿一齊煮。