再做黑麥包

        上次試做過黑麥包之後都無再整過，趁今日 dayoff 喺屋企無乜好做，就再整多一次呢個黑麥包，不過今次就將啲材料份量稍作修改，仲特意用上黑麥粉 ( pumpernickle ) 嚟做呢個包㖭呀！

材料：

高筋麵粉          140 克
黑麥粉              100 克
酵母                  3 克
可可粉              1 茶匙
即溶咖啡粉       1 茶匙

黑糖蜜              1 湯匙
糖                      2 茶匙
鹽                     1/2 茶匙
葛縷籽               2 茶匙
水                      約 100 毫升
粟米粉              適量

- 除水及粟米粉外，將全部材料放入食物處理器內開機拌勻。

- 慢慢加水直至搓成麵糰。

- 當麵糰變得有彈成時，將麵糰拎出，放上已灑粉嘅枱面上，繼續搓揉、摔打成光
  滑軟熟嘅麵糰。

- 麵糰會越搓越濕，所以要不斷加入適量手粉。

- 搓好後，將麵糰放入已灑粉嘅兜內，包好保鮮紙，發酵約 1 個鐘至兩倍大。

- 拎出麵糰，排氣後平均分割成 4 份，分別滾圓。

- 烤盤墊上入爐防黏紙，灑上粟米粉後，將麵糰放上。

- 麵糰用保鮮紙蓋住，之後發酵約 45 分鐘至兩倍大。

- 發酵完成後，用水噴濕麵糰表面，灑上粟米粉，之後用刀喺麵糰表面割紋。

- 放入已預熱至 180 °C 嘅焗爐內焗 30 分鐘，入爐後 10 分鐘再噴多次蒸氣。

- 出爐後放上架上攤凍，即可享用。

以上材料份量可做直徑約 10 厘米麵包 4 個。

Pumpernickel 黑麥粉其實都係裸麥粉，
只不過係粗粒研磨嘅裸麥粉。

 

 

唔知係咪因為用咗呢隻有機黑麥粉嘅關係，麵糰香味特別濃烈，
搓緊麵糰時已經聞到，仲帶出咗咖啡香氣㖭！

 

因為黑麥粉係粗粒研磨關係，所以包肉不但更加扎實，仲好有粒粒 o趙頭，
表面亦焗到香脆，今次個改良版好成功呀！


 

Notes：

- 有關製作注意重點，請參閱《 自家製黑麥包 》。