老人癡呆抹茶紅豆包

        睇到呢個 topic，唔好以為呢個包患咗老人癡呆，又或者係食完呢個包會變老人癡呆呀，查實係呢個包由一個老人癡呆病發嘅人整啫！！

        今日繼續清紅豆餡，今次就用嚟呢個抹茶紅豆包。

你哋睇唔睇得出有咩問題呢？

 

        事緣係咁嘅，我一向都習慣將麵糰放入電飯煲度發酵，按下電飯煲保溫掣，半分鐘就已經夠哂溫度，每次發酵效果都好好。點知今日又試老人癡呆，明明將麵糰放入飯煲時都仲記得提自己半分鐘後就熄掣，點知做做吓其他嘢就完全無咗件事，到後尾發理時，我諗都已經過咗幾分鐘喇！我即刻熄掣，跟住即刻睇吓個麵糰，噢，個飯煲內鍋已經熱到燙手，無可能徒手拎起，啲酵母實死無生喇！！！麵糰底部仲已經乾硬哂 o添！真係救命呀！！！！！！

 

你睇，最後發酵後，個 "塊" 綠茶麵糰仍然好薄，好明顯失敗得好嚴重啦！

 

焗完出爐之後個死款就係咁喇，最頂嗰層綠茶麵包完全發唔起囉！
連帶無事嘅紅豆麵糰都俾佢壓住，發得唔高！

 

        不過話時話，個 texture 又 OK 喎！完全唔覺硬，仲好軟熟，不過學老竇話齋，綠茶味有啲苦澀，下次再整時要減綠茶粉份量至得喇！

        今次唔打食譜啦，無哂 mood 喇！ 下次再整個靚靚兼調好材料份量先出食譜啦！