銅鑼燒 Dorayaki

        冰格盒紅豆餡食極都食唔完，依家天氣又熱又濕，真係怕放喺櫃度包紅豆 "毆" 蟲，都係盡快食咗啲舊嘅再煮埋包紅豆佢喇！

        噚日首先整叮噹豆沙餅。

材料：
雞蛋              1 隻
蜂蜜              7 克
醬油              2 克
味醂              2 克
橄欖油          6 克
水                  30 克
低筋麵粉      25 克
泡打粉          1/4 茶匙
糖                  30 克
紅豆餡          90 克

- 先將雞蛋分開成蛋黃同蛋白；麵粉同泡打粉混合過篩 3 次。

- 蛋白用打蛋器拂至起泡，然後分次加入糖打成蛋白霜，之後放入雪櫃冷藏保存。

- 將蜂蜜、醬油同味醂加入蛋黃度，邊加油邊用打蛋器攪拌混合。

- 之後將水加入與蛋漿拌勻。

- 將粉類加到蛋漿，用打蛋器攪拌混合。

- 加少量蛋白霜到麵糊混合，再將剩餘嘅蛋白霜倒入，用膠刮輕手拌勻。

- 燒熱平底鑊，將麵糊用匙羹勺入鑊，推開成約 5 厘米直徑，用慢火煎。

- 當麵糊煎到有小氣泡時，就可以反轉繼續煎。

- 另一面都煎熟後就可以盛起放上架上，用保鮮紙冚住保濕。

- 煎餅攤凍後就可以勺上紅豆餡，再夾上另一塊煎餅即成。

以上材料份量可做直徑 6 厘米豆沙餅 6 個。

食譜出自《糕點教科書》。

原來呢個豆沙餅都唔易整，整咗六個都係得呢兩個較為似樣少少咋！

 

以為煎到好乾啦，點知又唔係喎，非常軟熟，可能係因為有蜜糖保濕之餘，
又用咗分蛋法去整，會比較鬆軟。

 

        學 Winnie 話齋，整一次真係好鬼嘥時間，煎好耐都唔覺有反應，校大火少少煎，諗住會快啲啦，點知又會燶，煎一塊都要用好多時間！企喺廚房度又攰又熱，激鬼氣，後尾直情將麵糊放咗入鑊之後就走出去練琴，無眼睇佢！！ 相信之後都唔會再整喇！

Notes：
- 材料中嘅水喺原食譜係牛奶。

- 紅豆餡可買現成品代替。

- 蛋白霜打好後放入雪櫃保存，可保持其穩定性，若果消泡的話，可用打蛋器再次拂
  打至挺身。

- 若紅豆餡比較乾身的話，可酌量加水拌至濃稠。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！