香橙朱古力雪糕 Orange Chocolate Ice Cream

        咪以為我今日咁勤力，一日內整成四樣嘢呀！查實呢個雪糕係上個星期已經整好 o架喇，不過一直都無機會食啫！

        盒 cream 開咗封之後，當然最好快啲用完佢啦，用嚟整雪糕都係一個唔錯嘅方法，因為用量相對比較多，可以快啲清哂佢。今次輪到整朱古力雪糕喇！

材料：
豆漿              180 毫升
蛋黃              2 個
糖                  60 克
苦朱古力      60 克
可可粉          1 1/2 湯匙
糖                  1 湯匙
淡忌廉          120 毫升
橙皮茸          1 個橙份量
君度橙酒      2 湯匙
瑪利餅          20 克

- 豆漿用慢火加熱，差不多快要煮滾時就可以熄火。

- 蛋黃同糖混合，用電動打蛋器打至差不多白色狀態。

- 將煮熱豆漿逐少加入蛋糖混合物中，拌勻。

- 將混合物倒番入煲內，用慢火煮至濃稠後離火，其間必須不斷攪拌。

- 蛋漿混合物降溫至約 60 °C 時，加入朱古力攪拌至完全溶化，備用。

- 可可粉與 1 湯匙糖混合好，將少量朱古力混合物加入拌勻。

- 將剩餘嘅朱古力混合物加入，均勻混合好，之後過篩。

- 混合物隔冰水冷卻，然後放入雪櫃約 3 - 4 個鐘，將混合物充份雪凍。

- 用電動打蛋器將淡忌廉打至七成企身，之後拌入橙酒、橙皮茸及朱古力混合物。

- 包好保鮮紙，放上冰格雪約個半鐘，等忌廉混合物開始雪硬時就用電動打蛋器
  打鬆。

- 放番入冰格，一個鐘後再次打鬆，重複步驟多 2 次，其間相隔半個鐘。

- 將瑪利餅略為壓碎，之後用膠刮拌入混合物內。

- 放入雪櫃雪至硬身即成朱古力雪糕。

以上材料份量可做 4 - 5 人份雪糕。

食譜嚟自福田淳子嘅《我愛冰淇淋》。

味道非常之正，比起上次整嘅香橙朱古力磚有過之而無不及，
朱古力同橙味都更加香濃。

 

唔知係咪因為唔記得預先解凍至稍為軟身就夾硬 "畢" 嘅關係，
"畢" 極都 "畢" 唔到球形，加埋有餅乾碎阻住就更加碎上加碎！

Notes：
- 材料中嘅豆漿，於原食譜為牛奶；橙皮茸則原為橙皮碎。

- 蛋漿混合物降溫至約 60 °C 先拌入朱古力，可避免朱古力因高溫而出現分離現象。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！