素菜米紙卷

        早排打開櫃摷嘢時，先至發覺原來仲有啲用剩嘅越南春卷皮，咁今晚用就用佢嚟整素菜米紙卷，攪攪新意思之餘，又唔駛淨食菜咁單調。

材料：
越南春卷皮
唐生菜
素雞
甘荀
青瓜

蘸汁：
越式魚露汁

- 生菜洗乾淨後摘去菜梗；甘荀刨皮後切條。

- 素雞略沖洗後切粗條；青瓜洗乾淨後切條。

- 煲滾水，加少許鹽，放甘荀及素雞放入汆水，之後盛起瀝乾水份。

- 米紙用水浸至軟身，拎出後用毛巾索乾水份。

- 米紙上放上一塊生菜，再喺上面放上其餘材料。

- 先將米紙底部摺起，跟住左右摺入，之後再向上捲起收口即成。

 

 

食完濃味餸菜之後，食件素菜米紙卷，感覺清新。

 

蘸魚露汁同食，又係另一番滋味。

Notes：

- 青瓜切開後最好去瓤，避免水份滲出令米紙溶化。

- 如果鍾意的話可將素雞、甘荀同青瓜加適量調味炒熟，攤凍後即可用作餡料。

- 蘸汁做法，請參閱《越式魚露汁》。