今晚第一次整白切雞，以前媽咪同老竇整嚫白切雞都係蒸嘅，今日上網睇先知道原來好多 blogger 都係用浸嘅方法，本來我都諗住用番蒸嘅方法，一來乾手淨腳啲，又唔駛洗煲，二來就係覺得用浸嘅方法會將隻雞啲味浸哂出嚟，應該無咁好食，但係後尾見到有個 blogger 話用浸嘅方法整，隻雞前所未有咁滑，仲滑過豆腐花咁話，真係勁誇張！！
好，咁就一於試試浸雞啦！
材料：
冰鮮雞
薑蓉
蔥花
雞粉
鹽
醃料：
紹酒
薑汁
- 雞洗乾淨、瀝乾水，用抹手紙索乾水份後用醃料搽勻裡裡外外，醃 10 分鐘。
- 煲滾水，加少少鹽，將雞浸入水內 1 分鐘，拎起，倒去雞腔內嘅水。
- 之後再浸多 1 分鐘，同樣做法。
- 將雞放回煲內，冚蓋滾 5 分鐘後熄火，焗約 20 -25 分鐘。
- 將雞拎出，立即放入冰水內過冷河至雞完全涼透。
- 撈起，瀝乾水份即可切件上碟。
- 將蔥花、薑蓉、鹽同雞粉拌勻，備用。
- 燒熱適量油後倒入薑蓉同蔥花內，拌勻，即成為薑蔥蓉。
平時都係老竇負責洗雞同剪雞，今晚我又豁出去喇，自己一手包辦。
但好神奇，估唔到隻雞一啲都唔肥喎！而且剪雞原來都好輕易，
仲唔怕斬到周圍都係油 o添，真係好方便。
我一向都係食雞胸，我夾咗一嚿俾老竇試食，佢都未等我開口問佢，
佢已經即刻話好嫩滑！無錯，真係比起蒸滑好多好多，
但係就無滑過豆腐花咁誇囉，雞皮都真係爽啲 o架！
Notes：
- 將雞浸 1 分鐘後拎出倒去雞腔內嘅水，可以將清除雞腔內嘅血水。
- 若果浸雞水未能完全浸過雞面時，焗 10 分鐘後需要反轉身繼續焗。
- 將浸好嘅雞浸冰水過冷河，目的係要雞皮立即收縮，到切件後就唔會再收縮，亦
可以令雞皮比較爽脆。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
幾時都係浸架..我都係用浸...蒸既時間長同埋冇咁均勻...你下次可以整埋豉油雞啦..
回覆刪除[版主回覆05/22/2011 01:00:00] 但係其實蒸會唔會更加原汁原味呢？我試過留低 喺碟上面 嘅水，非常之甜，但隻雞其實就無乜味，初時以為係冰鮮雞無味，但 照咁睇應該又唔係無味喎！可能落哂去浸雞水度。 係囉，以前食蒸 嘅白切雞都比較 嚡！ 豉油雞其實我都想整 o架，不過唔知點點處置 嗰一大煲豉油雞汁料！
有時整雞飯比老公同仔食個時,佢地會覺得唔夠入味,但已經醃過夜
回覆刪除唔知係咩原因呢?
[版主回覆05/22/2011 01:04:00] 妳有冇連雞腔裡面都搽埋醃料呀？如果淨係搽雞皮應該比較難入味，因為雞皮脂肪較厚。 不過其實我覺得好講隻雞本身 嘅質素，好多人都話，想白切雞好食 ，一定要用靚新鮮雞。咁妳係咪用新鮮雞呢？
好靚喎
回覆刪除[版主回覆05/22/2011 01:01:00] 多謝妳呀！如果用黃油雞整仲靚呀！
浸雞我將鹽落入滚水......大火一滚起即熄火浸一小時即成。
回覆刪除[版主回覆05/23/2011 13:24:00] 係喎，妳唔提都唔記得打埋滾水要落鹽 o添，即刻補番先！
thanks ah..last nite i watched Siu Yee show in tvb always talk about this..i'm thinking if too much to clean after..cos with the oil in the pot..but i think now that you said the good result...so i 'll try sometime sin!
回覆刪除[版主回覆05/25/2011 02:18:00] Yes, you're right! I need to clean & wash more with this method. If the chicken is just steamed, then only one plate should be cleaned. However, it's really yummy then the steamed one.
成隻雞浸我都未試過, 因為我地得兩個人, 只係浸雞脾+雞翼。
回覆刪除下一次要試下浸整隻雞.....
[版主回覆05/27/2011 11:10:00] 我屋企都係得兩個人食咋，所以浸一隻雞分兩餐食。我買呢隻係細細隻 嘅芝麻雞。