朱古力南瓜批 Chocolate Pumpkin Pie

        呢個批真係想整好耐好耐 o架喇，因為我係南瓜精嘛！ 但係一諗起要整個批底就真係有啲郤步喇，事關整批底好鬼煩，又要雪、又要擀，仲分分鐘整到成手油淋淋 o添。今日整就仲衰，可能因為天氣又熱又濕，捽牛油粉粒時啲粉已經勁軟、勁瀉身，攪到我要額外加粉之餘，仲要將個粉糰放上冰箱至雪夠硬身，方便擀薄。查身呢個批底已經做過好幾次o架喇，真係估唔到會攪成咁，激死人呀！

        整批嘅食譜我都有好多，方法大致分兩種，我之前整嚫都係先焗好個批底先再放上餡料，但係今次呢個南瓜批就唔係咁做，我參考過幾過食譜都係唔駛預先焗好，放上批模後直接加餡料上面，之後先一次過焗，其實我都有啲擔心個底未焗熟或俾啲南瓜蓉整腍個皮，不過唔緊要啦，咪試一次咁多囉，真係失敗的話，咪當上咗一課，下次唔好再咁做囉！學 Winnie 話齋，佢整餅係從失敗中學習嘛！

批底

材料：
低筋麵粉      135 克
杏仁粉          30 克
牛油              68 克
糖                  35 克
蛋液              38 克

- 麵粉先過篩 3 次，與糖及杏仁粉混合好。

- 加入牛油，用指尖將牛油捽入麵粉混合物內成麵包糠狀。

- 倒入蛋液，輕手搓成麵糰，之後用保鮮紙包好，放入雪櫃雪約 15 分鐘至挺身。

- 拎出麵糰，隔住保鮮紙，用擀麵棍擀薄成麵皮。

- 將麵皮鋪上撻模上，用手指輕壓，令麵皮緊貼撻模。

- 用叉喺麵皮表面周圍隨意拮窿，之後再放番入雪櫃保持冰凍。

南瓜餡料

材料：
南瓜肉          200 克
黃糖              30 克
蛋液              62 克
肉桂粉          1/4 茶匙
荳蔻粉          1/8 茶匙

- 南瓜切片，隔水蒸熟至腍，趁熱用叉壓成南瓜蓉。

- 加入糖，拌勻，再加入蛋液混合好。

- 最後加埋肉桂粉同荳蔻粉，拌勻即可。

朱古力淋面

材料：
朱古力          75 克
淡忌廉          75 克

- 淡忌廉煮熱，之後倒入朱古力內。

- 將淡忌廉同朱古力不斷攪拌直至朱古力完全溶解為止。

組合

- 南瓜餡料倒入撻皮上面，用膠括掃平表面。

- 將撻模放入已預熱至 180 °C 嘅焗爐內焗約 30 分鐘至熟。

- 出爐後攤凍，然後將已煮好嘅朱古力漿淋上面，待朱古力漿凝固即成。

朱古力淋面唔夠平滑靚仔，要多多練習至得！

 

朱古力味道好濃，反而主角南瓜味道就唔係太出。

 

唔知係咪因為額外加粉嘅關係，攪到油嘅份量相對少咗，
所以咁黐模，真係咁多次都未試過！同埋無預先
焗個批底，始終都係差少少，底唔夠脆！

 

Notes：
- 若批底麵糰太柔軟或瀉身的話，可加入少量麵粉搓勻，之後放上冰格雪硬。

- 批底麵皮表面拮窿，可防止麵皮入爐後受熱膨脹，以致撻底拱起。

- 全部蛋液份量剛好係兩隻雞蛋份量。

- 如果唔係用甩底撻模的話，可預先喺撻模內墊入爐紙，之後先再鋪上麵皮，焗好
  之後就可以容易啲脫模。

- 做朱古力淋面時，朱古力與淡忌廉份量比例可依個人口味調配。

 

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！