芒果黑白糯米

        幾乎每年都會最少整一次呢個芒果糯米，因為我實在太鍾意食喇！之前整香芒布甸卷、紅咖喱雞、芋蓉西米露，用剩咗啲椰漿同芒果，屋企又長期有黑、白糯米喺度，有齋哂材料，唔整都對唔住自己啦！之前用過兩種唔同方法整，今晚又試咗第三種方法。 

        話時話，之前一口氣整咗三款朱古力食品，咁啱得咁橋，連糯米都連環三擊！第一擊係香芒布甸卷，第二擊係芝麻麻糬多士，呢個芒果黑白糯米就係第三擊。
 
 

材料：
黑糯米      80 克
白糯米      80 克
滾水          75 毫升
椰漿          65 毫升
糖              1 1/2 湯匙
鹽              少許
芒果          1 個

- 糯米洗乾淨，分別用水浸 6 個鐘，之後瀝乾水份，放入碗內。

- 將 10 毫升滾水倒入白糯米度，拌勻；65 毫升滾水倒入黑糯米度，拌勻。

- 隔水蒸 35 分鐘至熟透，煮成糯米飯。

- 椰漿、糖同鹽拌勻，平均分成兩份，分別加入兩種糯米飯內。

- 分別將兩款糯米飯倒入煲內，用慢火煮至所有椰漿被完全吸收，然後上碟。

- 芒果去皮，起肉後切成粒，與糯米飯伴食。

 

食譜參考自鄭慧芳、胡玉玲編著嘅《香港人氣甜品》。

 

 

 

嘩，睇見都流哂口水喇，it's my favourite！

三個方法之中，我覺得呢個煮法係最好味嘅，不過就最繁複！

Notes：
- 如果想椰漿味更加香濃的話，可以用額外椰漿加適量粟粉拌勻，之後倒入煲內煮
  至濃稠成椰漿芡汁，食時淋上糯米飯面即可。
 

- 若果一次過食唔哂的話，可將糯米飯放入雪櫃保存，食之前蒸番熱就得。

- 原食譜喺蒸糯米時有加到班蘭葉一齊蒸。

- 你哋亦可以參考番我之前嘅兩種做法，睇吓邊種啱你：

  芒果椰汁鴛鴦糯米

  芒果黑糯米