蒸蘿蔔糕

        今年過年無整到蘿蔔糕，只係整咗五香臘味芋頭糕，但其實都係覺得蘿蔔糕好食啲，因為芋頭糕相對比較乾身。但係蘿蔔糕我又鍾意食蒸多過煎喎，一來我不嬲都唔太好煎炸嘢啦，二來蒸蘿蔔糕比較濕潤軟滑，好似食緊布甸咁，一羹羹 "畢" 嚟食，好滋味呢！

材料：
臘腸         1 條
冬菇         4 隻
蝦乾         適量
蘿蔔          670 克
清雞湯      150 毫升

粘米粉      45 克
粟粉          40 克
水            150 毫升
蔥花         適量

 

調味料：
鹽           1 茶匙
糖             適量
胡椒粉     少許

- 臘腸隔水蒸至軟身；冬菇洗乾淨，用清水浸發；蝦乾洗淨，用清水浸軟。

- 將以上三樣材料切粒備用。

- 蘿蔔去頭尾、刨皮，切開兩份，一份刨絲，另一份切幼條。

- 將全部蘿蔔落鑊，用雞湯煮腍，之後加入調味，拌勻。

- 粘米粉同粟粉混合好，加水拌成粉漿，之後撞入蘿蔔內。

- 加入配料粒，拌勻後就倒入碗內。

- 隔水蒸約 20 - 25 分鐘，灑上蔥花，再蒸多 1 - 2 分鐘即可。

食譜參考自 Cherry Poon 嘅砵仔蒸蘿蔔糕。

 

上面材料份量可做兩大碗蘿蔔糕。

 

  

你睇，真係好似布甸咁幼滑呀，非常好食！

 

 

今晚就係食芋頭排骨粥同蘿蔔糕喇！

 

 

啲粥煲得非常綿，前後都只係用明火煲咗半個鐘度咋，
真空煲真係既方便又環保。

 

Notes：

- 配料可隨自己喜好增減。

- 浸冬菇水同浸蝦乾水可留用，混合後加清水至適當份量，即可作開粉漿用。